Мулоқоти судманди ректор бо сафири Украина

Душанбе, 20.11.2014.(АМИТ «Ховар», Раъно Нусратуллозода).-Бо даъвати раёсати Донишгоҳи давлатии омӯзгории Тоҷикистон ба номи С.Айнӣ сафири Ҷумҳурии Украина дар Тоҷикистон Виктор Никитюк ба донишгоҳ ташриф овард ва бо ректор Абдуҷаббор Раҳмонов мулоқот намуд.
Тавре ки аз донишгоҳи мазкур  Бахтиёри Абдураҳим иттилоъ дод, сарвари таълимгоҳ  ҳадафи мулоқотро машварат барои баргузории конфронси ҷумҳуриявӣ бахшида ба 200-солагии олими барҷастаи украин Т.Шевченко арзёбӣ кард. Тавре ки А.Раҳмонов зикр намуд, донишгоҳ солиёни зиёд номи ин шахсияти маъруфро доро буд ва месазад, ки солгарди ӯ ба таври шоиста таҷлил гардад. 
А.Раҳмонов аз сафир дархост намуд, ки ҳар маълумоти вобаста ба Т.Шевченко, аз қабили наворҳо, китобҳо ва аксҳо, ки дар даст дорад, ба онҳо ирсол намояд, то ҳамоиш боз ҳам бошукӯҳтару хотирмонтар гардад.
О.Никитюк, сафири Ҷумҳурии Украина барои даъват ва пазироии самимӣ ба роҳбарияти донишгоҳ  изҳори сипос кард ва таҷлили арзишманди солгарди олими барҷаста Т.Шевченкоро иқдоми наҷиб ва тақвиятбахшандаи равобити дӯстии ду мамлакат унвон намуд. 
Пас аз мулоқот сафир аз толорҳои баргузории конфронс дидан кард ва аз сатҳи омодагии онҳо қаноатманд гардид.
Лозим ба тазаккур аст, ки 200-солагии донишманди намоёни украин Т.Шевченко 28-уми ноябри соли ҷорӣ дар толори фарҳангии донишгоҳ  баргузор хоҳад шуд.