Вайронии оилаҳо аз коҳиши маърифати оиладорӣ

Душанбе, 24.11.2014. (АМИТ «Ховар», Лайло Тоирӣ).- Ҳафтаи гузашта Кумитаи кор бо занон ва оилаи назди Ҳукумати Ҷумҳурии Тоҷикистон дар мактаби таҳсилоти миёнаи умумии №72-и ноҳияи Фирдавсӣ бо занону духтарон вохӯрӣ баргузор намуд.
Дар ҷамъомади мазкур намояндаи кумита, бахши кор бо занон ва оилаи шаҳри Душанбе ва омӯзгорон дар бораи одоби ҷавондухтарон, маърифати зан ва пешгирии ҳодисаҳои номатлуб сухан гуфтанд.
Бино ба гуфтаи намояндаи кумита Мадина Бобоева ҳамаи мушкилоти ҷомеа аз оила сар мезанад. Имрӯзҳо вайроншавии оилаҳои ҷавон бисёр ба назар мерасад, ки сабаби он барвақт ба шавҳар додани духтарон ва огоҳ набудани онҳо аз маърифати оиладорӣ мебошад. Бархе аз падару модарон намегузоранд, ки духтарон то охир мактаби миёнаро ба итмом расонида, касб омӯзанд, ба мактабҳои олӣ дохил шуда, донишу малакаи худро сайқал диҳанд, то ин ки дар ҳаёти мустақилонаи худ аз мушкилиҳо ба зудӣ раҳоӣ ёбанд. Соҳиби илму дониш будани зан ҳатмист, зеро дар зиндагӣ танҳо зани бомаърифат метавонад хонадонашро обод кунад ва фарзандони ватандӯсту инсондӯст ба воя расонад.
Дар ин бора аз Кумитаи кор бо занон ва оилаи назди Ҳукумати Ҷумҳурии Тоҷикистон хабар доданд.