«Оила дар таърихи Осиёи Марказӣ»-симпозиум

Душанбе, 4.12.2014. (АМИТ “Ховар”, Ситораи Боймурод).- Чанде қабл дар Донишгоҳи Ҳейделберги Ҷумҳурии Федеративии Олмон симпозиуми  “Оила дар таърихи Осиёи Марказӣ” баргузор гардид. 
Дар симпозиум устодон ва олимони ҷавон аз макотиби олӣ ва марказҳои илмии 13 давлат: Тоҷикистон, Олмон, Англия, Фаронса, Русия, Ҳолланд, Полша, Ҷопон, Қазоқистон, Қирғизистон, Афғонистон, Ӯзбекистон ва Венгрия ширкат намуда, дар маҷмӯъ 20 маърӯзаи илмӣ  муҳокима  шуд.
Дар чорабинии мазкур аз Донишгоҳи давлатии Хуҷанд ба номи академик Бобоҷон Ғафуров мардумшиноси варзида, дотсенти кафедраи таърихи ватан Муҳиддин Файзуллоев дар мавзӯи «Мақоми оила дар маҳаллаҳои шаҳри Хуҷанд ва атрофи он» ва дотсенти кафедраи археология ва этнографияи халқи тоҷик Юсуфҷон Бобоев дар мавзӯи «Ангораҳои этнографӣ дар минералогия»-и Абӯрайҳон Берунӣ маърӯза намуданд.
Дар назар аст, ки пас ин конфронс алоқаҳои илмии ДДХ ба номи академик Бобоҷон Ғафуров ва Донишгоҳи Ҳейделберг ба роҳ монда хоҳанд шуд, зеро роҳбарияти Донишгоҳи Ҳейделберг ба фаъолияти олимони тоҷик таваҷҷуҳ зоҳир намудааст.