Х. Асозода: Дар Тоҷикистон кӯпрукҳои алтернативӣ сохта мешаванд

Душанбе, 26.01.2015 (АМИТ Ховар, Манижа Баҳромзода).-           Вазорати нақлиёти кишвар иттилоъ медиҳад, ки дар самти муҳайё намудани шароит  барои интиқоли бор  тавассути  роҳҳои  байналмилалии ҳудуди Тоҷикистон  пешниҳодҳои  зиёд намудааст. Яке аз ин пешниҳодҳо сохтмони кӯпрукҳои алтернативӣ мебошад. «Мо пешниҳод кардем, ки агар дар Ҷумҳурии Тоҷикистон роҳҳои алтернативӣ надошта бошем, аққалан кӯпрукҳои алтернативии тез ҷамъу  кушод мешуда дошта бошем»,- иброз дошт  Хайрулло Асозода, вазири нақлиёти Тоҷикистон имрӯз.  26 январ зимни нишасти хабарӣ.
         Ба гуфтаи вазири нақлиёт пешниҳод оид ба сохтмони кӯпрукҳои алтернативӣ дар ҳудуди Тоҷикистон қабул гардида, кор дар ин самт дар ояндаи наздик оғоз мешавад. «Мо  як ширкати австриягиро қабул кардем ва дар ин самт бунёди як кӯпруки 300 тоннагие, ки  тез  ҷамъ ва кушода мешавад, дар нақша ҳаст»,-иттилоъ дод  Хайрулло Асозода. Вазири нақлиёт  дар робита ба макони  сохтмони кӯпруки мазкур  гуфт, ки макони он дар Тоҷикистон  ҳоло аниқ набуда, дар назар аст он дар ҷойе сохта шавад, ки ба он ниёзи бештар бошад.
       Соли 2014 дар ҳудуди Тоҷикистон 18 кӯпрук бо сабаби вазнин  будани бор ба ҳолати садамавӣ дучор шудааст, ки ин нишондод дар соли 2013  31 ададро ташкил додааст.