Қадршиносии донишманди тоҷик дар Теҳрон

 
Душанбе, 12.05.2015.(АМИТ “Ховар”, Марзия Саидзода).-    Конуни адабиёти Эрон /Иттиҳодияи нависандагон/ дар Теҳрон маросими бузургдошти  донишманди тоҷики муқими Қазоқистон Сафар Абдуллоҳро баргузор намуд. Маросими мазкур таҳти унвони  «Ватани форсӣ» доир шуда, дар он шахсиятҳои фарҳангӣ ва адабӣ аз Тоҷикистон, Эрон ва Афғонистон доир ба фаъолиятҳои Сафар Абдуллоҳ сухан карданд. Дар маросим доктор Асғари Додбеҳ — устоди саршиноси забону адаби форсӣ, доктор Ҳаддоди Одил — раиси Фарҳангистони забону адаби форсӣ, доктор Мирзо Муллоаҳмад, доктор Нуралӣ Нурзод, Ҳасани Қарибӣ — мудири робитаҳои байналмилалии Фарҳангистони забону адаби форсӣ, Ҳодии Киёсарӣ — раиси Конуни адабиёт, Муҳаммадалии Раҷоӣ, Муҳаммади Раҳимӣ (аз шоирони Афғонистон) нақши ин донишманди маъруфи тоҷикро дар ташаккули забони форсӣ муҳим арзёбӣ намуда, С. Абдуллоҳро сафири фарҳангии адабиёти форсӣ дар Дашти Қипчоқ ва кишварҳои пасошуравӣ хонданд. Зикр шуд, ки Сафар Абдуллоҳ муаллифи беш аз 1000 мақолаи илмию пажуҳишӣ ва 50 китоб буда, маҷаллаи «Эроннома» — ро тани танҳо таҳия, таълифу тадвин ва тарҷума мекунад, ки то кунун 30 шумора мунташир шуда ва бузургтарин муаррифи адабиёти форсӣ дар миёни русзабонон мебошад. 
   Таъкид шуд, ки Сафар Абдуллоҳ чеҳраи шинохта буда, дар илм, пажуҳиш, тарҷума, шеър, рӯзноманигорӣ ва тадрис ҳам фаъолият мекунад ва парчами фарҳанги форсиро ҳарҷо бошад боло мебарад. Ҳаддоди Одил дар нишаст таъкид намуд Сафар Абдуллоҳ девори маҳками забони форсӣ дар Осиёи Миёна аст.