Муҳлати санҷишҳо барои субъектҳои хоҷагидор кам карда мешавад

Душанбе, 30.06.2015. (АМИТ «Ховар»). — Дар лоиҳаи Қонуни Ҷумҳурии Тоҷикистон  «Дар бораи   санҷиши фаъолияти  субъектҳои  хоҷагидор», ки имрӯз дар маҷлиси Ҳукумати Ҷумҳурии Тоҷикистон маъқул дониста шуда, ба баррасии Маҷлиси намояндагони Маҷлиси Олии Ҷумҳурии Тоҷикистон пешниҳод гардид, омадааст, ки муҳлати санҷишҳо барои субъектҳои калони соҳибкорӣ на зиёда аз 10 рӯз, барои субъектҳои миёнаи соҳибкорӣ то 5 рӯз ва барои субъектҳои хурд 2 рӯз муқаррар шавад.
Тавре зикр гардид, лоиҳаи қонуни мазкур дар асоси супоришҳои Сарвари давлат Эмомалӣ Раҳмон, ки дар паёми имсолаи ӯ ба Маҷлиси Олии Ҷумҳурии Тоҷикистон баён гардида буд, таҳия ва пешниҳод шудааст. Ҳадафҳои асосӣ аз таҳия ва пешниҳоди лоиҳаи ин қонун таъмини шаффофият дар санҷишҳо, пешгирӣ аз санҷишҳои беасоси такрорию дурудароз  ва додани сабукиҳо ба соҳибкорону сармоягузорон аст.