Дарёфти беш аз 7 кг ҳероин аз дохили чархи эҳтиётӣ

Душанбе, 24.07.2015. (АМИТ «Ховар», Лайло Тоирӣ).- Шабонарӯзи гузашта дар натиҷаи гузаронидани амалиёти фаврӣ-ҷустуҷӯӣ кормандони Агентии назорати маводи нашъаовари назди Президенти Ҷумҳурии Тоҷикистон дар ноҳияи Шаҳристони вилояти Суғд аз дохили чархи эҳтиётии  мошини «Тойота-Прадо» 7 бастаи маводи хокистарранги бӯи махсус доштаро ошкор намуданд.  Мутобиқи хулосаи Шуъбаи ташхиси криминалистӣ, маводи мусодирашуда ҳероин буда, вазни он 7 кг 116 граммро ташкил дод.
Бино ба иттилои агентӣ, тафтиши пешакӣ нишон дод, ки ронандаи мошин, сокини 53-солаи пойтахт мехост  ҳероинро берун аз ҷумҳурӣ интиқол диҳад. Ҳоло барои муайян ва дастгир намудани аъзои боқимондаи гурӯҳи ҷиноятпеша тадбирҳои зарурӣ андешида шуда истодаанд.
Инчунин кормандони агентӣ дар канори шаҳри Душанбе сокини 39-солаи пойтахтро дастгир намуданд. Ҳангоми азназаргузаронии сумкаи варзишии дастгиршуда аз дохили он 15 баста бо маводи сабзранг ошкор гардид.
Мутахассисони  Шуъбаи экспертизаи судии агентӣ муайян намуданд, ки маводи мусодирагардида ҳашиш буда, вазни он 18 кг 130 граммро ташкил дод.
Аз тарафи гурӯҳи фаврӣ-тафтишотӣ ҳамиштирокчиёни ҷиноят муайян шуда истодаанд.
Вазни умумии маводи нашъаовари мусодирашуда 25 кг 246 гр. мебошад.
Аз рӯи ҳодисаҳои номбаршуда аз тарафи Шуъбаи тафтишоти агентӣ парвандаи ҷиноӣ оғоз гардида, тафтиш давом дорад.