Харҷи 626,2 миллион доллар барои татбиқи 15 лоиҳа

Душанбе, 30.07.2015. (АМИТ «Ховар», Лайло Тоирӣ).-Ҳоло дар соҳаи нақлиёт 15 лоиҳаи гуногунсамт ва мухталифҳаҷм бо маблағи умумилоиҳавии 626,2 миллион доллари амрикоӣ мавриди татбиқ қарор дорад. Дар ин бора имрӯз зимни нишасти матбуотӣ  муовини аввали вазири нақлиёти Ҷумҳурии Тоҷикистон Суҳроб Мирзоев иттилоъ дод.   
Инчунин дар давоми сол оғоз гардидани корҳои сохтмонию таҷдидӣ боз дар якчанд иншооти нақлиётии барои рушди иҷтимоию иқтисодии кишвар муҳим, аз қабили навсозии роҳҳои мошингарди Душанбе — Турсунзода (аз ҳайкали Абуалӣ ибни Сино то дарвозаи ғарбии шаҳр) ва Исфара (Гулистон) — Хуҷанд дар нақша мебошанд. Имрӯзҳо корҳои омодасозии заминавӣ ва лоиҳавӣ барои оғози корҳо дар лоиҳаи таҷдиди роҳи мошингарди Қалъаихумб — Ванҷ марзи ноҳияи Рӯшон идома дошта, аз ҷониби комиссияи давлатӣ масири гузариши роҳ интихоб карда шуд. 
“Навсозии роҳҳои мошингарди Душанбе — Турсунзода, Айнӣ-Панҷакент ва Шӯрообод-Шоҳон аз ҷумлаи лоиҳаҳое мебошанд, ки анҷоми татбиқи амалии онҳо соли 2015 дар назар аст”, -илова намуд Суҳроб Мирзоев.