Коҳиши тиҷорати хориҷии Тоҷикистон дар шаш моҳи соли 2015

Душанбе, 14.07.2015 (АМИТ «Ховар», Фарзонаи Давлат).- Гардиши тиҷорати хориҷии Тоҷикистон дар шаш моҳи соли 2015 ба маблағи 2 миллиарду 5,1 миллион доллари амрикоӣ баробар шуд, ки нисбат ба ҳамин давраи соли 2014 563,4 млн. доллар кам гардида, 78,1%-ро ташкил додааст. Ин нуктаро раиси Хадамоти гумруки назди Ҳукумати Ҷумҳурии Тоҷикистон  Абдуфаттоҳ Ғоиб имрӯз, 14-уми июл зимни ҷамъбасти нимсолаи аввали соли равон иброз дошт.
Бино ба гуфтаи мавсуф, аз ин маблағи умумии тиҷорати хориҷӣ 1 миллиарду 574,8 миллион доллар ба воридот ва 430,3 млн. доллар ба содирот рост меояд. Тиҷорат бо кишварҳои аъзои Иттиҳоди Давлатҳои Мустақил 981,8 млн. доллар ё 49 дарсади гардиши тиҷорати хориҷии ҷумҳуриро ташкил медиҳад, ки аз ин маблағ 116,1 млн. доллар ба содирот ва 865,7 млн. доллар ба воридот мансуб аст. 
Ба таъкиди раиси Хадамоти мазкур, дар умум ҳаҷми асосии содироти мол ба давлатҳои Туркия 27,8 дарсад, Швейтсария 21,5 дарсад, Қазоқистон 18,5 дарсад, Эрон 7,1дарсад, Русия 6,6дарсад, Афғонистон 4,2 дарсад ва Покистон 3,2 дарсад марбут мебошад.
 -Воридоти асосии мол аз мамлакатҳои Русия 31,6%, Чин 17,1%, Қазоқистон- 16,8%, Эрон 4,2%, Туркия 4%, Туркманистон 3,5%, Литва 2,8%, Швейтсария 2,6%, Покистон 1,7% ва Аморати Муттаҳидаи Араб 1,6% ташкил медиҳад,-гуфт Абдуфатоҳ Ғоиб дар нишасти хабарии Хадамоти гумрук ба хабарнигорон.