Сокинон бо дастгирии мақомоти иҷроия барои 240 хонанда мактаб месозанд

Хучанд, 14.07.2015. (АМИТ «Ховар»).-Ба сохтмони бинои нави таълимӣ дар ҷамоати Чилгазии шаҳри Исфара санги асос гузошта шуд. Ба иттилои Иқбол Тешаев, сухангӯи шаҳрдори Исфара сокинони деҳоти Чилгазӣ — волидайни хонандагон ва соҳибкорони маҳаллӣ тасмим гирифтаанд, ки дар мактаби таҳсилоти миёнаи умумии №55 бинои нави таълимӣ барои 240 ҷойи нишаст бунёд намоянд.
Муассисаи таълимии мазкур аз боргоҳҳои асили илму маърифат дар деҳоти Чилгазӣ маҳсуб шуда, бинои мавҷудаи таълимии он, ки барои 340 нафар хонанда пешбинӣ шудааст, ҳанӯз соли 1975  ба истифода дода шуда буд.
Ҳоло дар ин таълимгоҳ 40 нафар устод ҳамарӯза дар ду баст ба таълиму тарбияи 433 шогирд машғул аст ва табиист, ки норасоии ҷойи нишасти таълимӣ мушкилот пеш оварда буд.
Лоиҳаи иншооти бинои нави таълимӣ, ки барои 240 ҷойи нишаст пешбинӣ шудааст, аз ҷониби меъморони КВД «Лоиҳакаш»-и шаҳри Исфара таҳия гардида, онро бинокорони ҶДММ «Нури дурахшон» бунёд хоҳанд кард.