Суханронии С. Аслов дар Академияи илмҳои ҷамъиятии Чин

Душанбе, 24.07.2015 (АМИТ «Ховар»).- 23 июли соли 2015 дар доираи сафари расмии худ ба Ҷумҳурии Мардумии Чин вазири корҳои хориҷии Ҷумҳурии Тоҷикистон Сироҷидин Аслов дар назди доираҳои илмӣ ва коршиносони Чин сухан гуфт.  
Дар баромади худ С.Аслов бори дигар мавқеи Президенти Ҷумҳурии Тоҷикистон Эмомалӣ Раҳмонро доир ба аҳамияти муносибатҳои шарикии стратегии Тоҷикистон ва Чин баён намуда,  иштироккунандагонро бо самтҳои асосии ҳамкорӣ миёни ду кишвар дар соҳаҳои сиёсӣ, тиҷоратӣ, иқтисодӣ, фарҳангӣ ва гуманитарӣ шинос кард.  
Вазири корҳои хориҷии Тоҷикистон таъкид сохт, ки робитаҳои Тоҷикистону Чин солҳои охир рушди хосса касб намудаанд ва дар инкишофи ҳамкории минтақавӣ таъсири мусбат доранд.  
Дар робита ба Афғонистон С. Аслов мавқеи кишварро оид ба дастгирии нақши ҳамоҳангсози СММ дар саъю кӯшишҳои байналмилалӣ ҷиҳати ҳалли масоили Афғонистон тасдиқ намуд. Вазири корҳои хориҷӣ оид ба саҳми Тоҷикистон дар рушди устувори иқтисодии Афғонистон дар сатҳи дуҷониба ва бисёрҷониба маълумот дод.  
С. Аслов инчунин дар бораи ташаббуси Раиси Ҷумҳурии Мардумии Чин Си Сзинпин оид ба бунёди камарбанди иқтисодии Шоҳроҳи Абрешим ибрози андеша намуд.  
Дар Академия вазири корҳои хориҷии Тоҷикистон ҳамчунин бо академик, доктори илмҳои иқтисодӣ, муовини президенти Академияи илмҳои ҷамъиятии Чин Сай Фан мулоқот анҷом дод.