Гурӯҳҳои кинологӣ дар сарҳад фаъол мегарданд

Душанбе, 10.08.2015. (АМИТ «Ховар», Лайло Тоирӣ).- Дар  амалиёти безараргардонии нуқтаҳои марзии кишвар, гурӯҳҳои кинологии  фаврии сарҳадбонон фаъол буда, бо таҷрибаи андӯхта дар чунин ҳодисаҳо дар ҳама гуна вазъият маҳорати баланди касбиву соҳавӣ нишон медиҳанд. Бино ба иттилои Вазорати мудофиаи ҷумҳурӣ ин навъи фаъолият дар Қувваҳои Мусаллаҳи ҷумҳурӣ аз бахшҳои муҳими хизмати ҳарбӣ марбут ба соҳаи сагшиносӣ ба шумор меравал. Мақсад аз бароҳмондани он ҳамчун фаъолияти фаврӣ, дар  таъмини амнияти давлату миллат пешгирӣ аз ҳар гуна хавфу хатар дар ҷомеа мебошад.
Афсарону сарбозони Қӯшунҳои сарҳадии Кумитаи давлатии амнияти миллии Ҷумҳурии Тоҷикистон, бахусус масъулини хадамоти кинологии сарҳадбонон ҳамчун муҳофизони корозмуда ва боэътимоди хати сарҳад кори низомии хешро дар ин самт бо ром кардан ва омӯзонидану омода намудани сагҳои хизматӣ баҳри иҷрои вазифаҳои муҳими ҳарбӣ ба роҳ мондаанд. 
Кинологҳои Қушӯнҳои сарҳадии Амнияти миллии кишвар дар назорат ва ҳифзи марзҳои давлатӣ нақши хоса доранд. Сагҳои хизматии онҳо аз ҷониби мутахассисони соҳаи кинологӣ махсус омӯзонида шуда, онҳо барои ҷустуҷӯйи ашхоси сарҳадшикан, дарёфти асбобу лавозимоти шубҳаовар, муайяну пешгирӣ намудани иззи пойи одамону ҳайвонот, посбонӣ ва дар дигар самтҳои дахлдор истифода мегарданд.
Барои мубориза бурдан бар зидди ҷинояткорӣ, табодули таҷрибаомӯзӣ аз якдигар ва бо мақсади баланд бардоштани маҳорати касбиву соҳавӣ, марказҳои кинологии сохторҳои низомии мамлакат бо сагҳои хизматии хеш дар баргузории машқу тамринҳои ҳарбии омӯзишӣ, ки бештари вақт дар минтақаҳои наздисарҳадӣ баргузор мегарданд, пайваста иштирок намуда, фаъолияти назаррас нишон медиҳанд.