Бозтоб шудани истиқлолияти давлатии Тоҷикистон дар расонаҳои Миср
Душанбе, 08.09.2015, (АМИТ «Ховар»). — 6-уми сентябри 2015, рӯзноманигори Бунгоҳи хабарии Ховари Миёна (Middle East News Agency) хонум Шуҳрат Ориф оид ба ҷашни истиқлолияти давлатии Тоҷикистон хабар пахш кард, ки дар он аз ҷумла омадааст: “Сафорати Тоҷикистон дар Қоҳира рӯзи чоршанбеи оянда 24-умин солгарди Истиқлоли кишвари худро ҷашн мегирад. Аз он таърих Тоҷикистон худро дар сабқат бо замону чолишҳо дарёфта, пайгирона роҳ ба сӯи оянда мепаймояд ва мардумаш — тоҷикон — мардуми куҳанбунёд, дорои фарҳанги асил ва офаринандаи таъриху тамаддуни бостонӣ мебошад.
Соли ҷорӣ шоҳиди таҳаввули муҳим дар густариши муносибатҳои дуҷониба буд, зеро байни роҳбарони ду кишвари дӯст — Президент Эмомалӣ Раҳмон ва Президент Абдулфаттоҳ ас-Сисӣ мубодилаи паёмҳо сурат гирифт. Рӯйдоди мазкур рағбати муштараки Душанбе ва Қоҳираро ба боло бурдани муносибатҳои дӯстонаи ду кишвар ба сатҳе, ки халқҳои тоҷику мисрӣ хостори онанд, таъкид мекунад.
Заминаи пойдори муносибатҳои Тоҷикистон бо Миср тавассути боздиди расмии таърихии Ҷаноби Олӣ Эмомалӣ Раҳмон, Президенти Ҷумҳурии Тоҷикистон аз Ҷумҳурии Арабии Миср, ки моҳи феврали соли 2007 баргузор гардида буд, гузошта шуд. Яке аз муҳимтарин натиҷаҳои он боздид кушоиши Сафорати кишвар дар Қоҳира буд, ки ба фаъолияти худ дар соли 2007 оғоз намуда, ба ин васила пулеро барои ба ҳам наздик намудани ду халқи ба ҳам дӯсти тоҷику мисрӣ ва густариши муносибатҳои дуҷонибаи ҳамкорӣ ба суди ду кишвар бунёд кард.
Тоҷикистон сиёсати дарҳои бозро пеш гирифта, муносибатҳои дӯстонаи мутавозинро бо ҳамаи кишварҳои ҷаҳон, чи наздик ва чи дур, чи бузург ва чи хурд, барқарор менамояд ва ҷиҳати эҷоди ҳамкории мутақобилан судманд ва муколимаи мутамаддини созанда бо ҷаҳони беруна талош меварзад ва таҷовузу бадхоҳиро дар муносибатҳои байналмилалӣ намепазирад, он чизеро, ки барои хеш писандида медонад, барои дигарон низ меписандад.
Халқи тоҷик ба олам донишмандону шоирони номдор, ба монанди Одамушшуаро Рӯдакӣ, Ҳаким Фирдавсӣ, Шайхурраис Ибни Сино, Аллома Берунӣ, Имоми Аъзам Абу Ҳанифа, Ҳакими ҷаҳон Умари Хайём, Лисонулғайб Ҳофиз, Шайх Саъдӣ, Мавлоно Румӣ ва дигаронро эҳдо намудааст”.
Мавриди зикр аст, ки хабари мазкур ҳамчунин дар дигар расонаҳои иттилоотии Миср бознашр шудааст.
Муовини Сарвазири Тоҷикистон бо вазъи соҳаи кишоварзии шаҳри Истаравшан шинос шуд
Беш аз 700 соҳибкори Бадахшон бо дастгоҳи назоратӣ-хазинавӣ таъмин мешавад
«ПАЁМ — РОҲНАМО БАРОИ ИҶРОИ ҲАДАФҲОИ ШОИСТА». Таҳти ин унвон ҳамоиши илмӣ-назариявӣ баргузор шуд
Дар мақомоти Ваколатдор бахшида ба 32-солагии таъсиси Қувваҳои Мусаллаҳ ҳамоиши идона доир гардид
БӮЙИ БАҲОР МЕРАСАД. Тоҷикистониёнро дар ин фасл чӣ гуна ҳаво интизор аст?
Имрӯз дар шаҳри Душанбе ҳаво то 17 дараҷа гарм мешавад
Дар қисми низомӣ дар вилояти Суғд Рӯзи дарҳои кушод доир гардид
Маркази ҷумҳуриявии илмии саратоншиносӣ бо дастгоҳи муосири ташхиси рентгении рақамӣ (Digital x-ray) таъмин гардид
Таҳаввулоти рақамӣ: чӣ тавр технологияҳои рақамӣ ҳаётро тағйир медиҳанд
Имрӯз дар Тоҷикистон ҳавои тағйирёбандаи бебориш пешгӯӣ мешавад
«БА ДАВЛАТУ МИЛЛАТАМ СОДИҚОНА ХИЗМАТ МЕКУНАМ!». Дар Душанбе Фестивали дӯстии афсарону сарбозон ва ҷавонони синни даъватӣ баргузор мегардад
«КАДБОНУИ БЕҲТАРИН». Дар ноҳияи Бобоҷон Ғафуров даври ноҳиявии ин озмун баргузор гардид
