Тоҷикони Сибир: «Мо шаҳрвандони давлати соҳибистиқлолем ва он Тоҷикистон аст»

 Душанбе, 14.09.2015. (АМИТ «Ховар»). — «Шаҳрвандони Тоҷикистон, ки дар вилояти Новосибирски Федератсияи Русия фаъолият доранд, рафтори ноҷавонмардонаи гурӯҳи ҷиноятпешаи собиқ муовини вазири мудофиа Абдуҳалим Назарзодаро, ки қасди ноором намудани ҷомеаро дошт, қатъиян маҳкум мекунанд», — чунин омадааст дар муроҷиатномаи ташкилоти минтақавии «Ҳифзи ҳуқуқи тоҷикистониён»-и шаҳри Новосибирск. Тавре ки роҳбари ташкилоти мазкур Исроил Шарипов ба АМИТ «Ховар» иттилоъ дод, ҳамаи шаҳрвандони Тоҷикистон, ки дар минтақаи Сибири Федератсияи Русия фаъолият мекунанд, аз сокинони Тоҷикистон, бахусус ҷавонон даъват мекунанд, ки зиракии сиёсиро аз даст надода, дар роҳи ҳимояи истиқлолияти давлатӣ ғайрату матонат ва ҳисси баланди ватандорию меҳанпарастӣ аз худ нишон диҳанд, зеро истиқлолият рамзи озодии миллат ва мамлакат, соҳибихтиёрии давлат ва нишонаи равшани ватандориву ватандӯстӣ мебошад.
«Вобаста ба шароити мураккаби ҷаҳони муосир мо, ҳар як шаҳрванди Тоҷикистон, чӣ дар дохил ва чӣ дар хориҷи мамлакат вазифадорем, ки ба қадри истиқлолият бирасем, онро аз ҳама гуна хатар ҳифз намоем, бар зидди ҳама гуна зуҳуроте, ки ба истиқлолияти давлатӣ хатар эҷод мекунанд, муборизаи беамон барем, аз ҳама гуна таассубу бегонапарастӣ ва тақлиди фарҳанги бегона парҳез намоем. Танҳо дар ҳамин ҳолат ҳар яки мо метавонем дар алоҳидагӣ бо ғурур иброз намоем, ки  шаҳрванди давлати соҳибистиқлолем ва онро ном Тоҷикистон аст»,-омадааст дар муроҷиатнома.