Полки моторонидашудаи тирандозии пойгоҳи низомии 201 дар Душанбе ҷойгир карда мешавад

Душанбе, 19.11.15. (АМИТ «Ховар»). — Полки  149 — уми  моторонидашудаи тирандозии  пойгоҳи  низомии  201 аз  вилояти  Хатлон  ба шаҳри  Душанбе  ва атрофи пойтахти  Тоҷикистон — пойгоҳи Лоҳур  гузаронида  мешавад. Баъди тағйири мавзеъ теъдоди  полки Русия  ва  вазифаҳои он тағйир  намеёбанд. Аз  ҷумлаи се  иншооти ҳарбии Русия  дар  минтақа  ду  иншоот — полки  моторонидашудаи Қӯрғонтеппа  ва  маркази  оптикию электронии  «Окно» — и Қӯшунҳои  кайҳонӣ  боқӣ  мемонанд. 
Тавре ки  дафтари  матбуоти  округи   марказии  ҳарбӣ  хабар  медиҳад, тағйири  мавзеъ бо Вазорати  мудофиаи  Ҷумҳурии  Тоҷикистон  мувофиқа шуда ва хусусияти  нақшавӣ дорад. Мақсад  аз  он  баланд  бардоштани  сатҳи тайёрии  ҳарбӣ  ва афзун  намудани неруи ҷангии полк  мебошад. Шаҳрчаи  ҳарбии  Кӯлоб  дар  ихтиёри  мақомоти ҳокимияти Ҷумҳурии  Тоҷикистон  гузошта  мешавад. 
Пойгоҳи  низомии  201 калонтарин ҷузъу  томи Қувваҳои Мусаллаҳи Федератсияи  Русия  берун  аз ҳудуди  он ба шумор  меравад. Тайи  соли  2015  мушовирони  Русия  беш  аз 1 ҳазор  мутахассиси артиши  Тоҷикистонро тарбия  намуданд. Моҳи  сентябр имкониятҳои  ҳарбии пойгоҳ бо  гурӯҳи чархболҳои  Ми — 8  ва  Ми — 24  мустақар  дар фурудгоҳи  низомии «Айнӣ» дар  30  километрии  Душанбе афзун  карда шуданд. Созишномаи  моҳи  октябри  соли  2012  имзошуда ба  полк  имкон  медиҳад, ки  камаш   то  соли  2042  дар  Тоҷикистон  бошад.