Барак Обама нияти нест кардани «Давлати исломӣ» — ро дорад

Душанбе, 07.12.15. (АМИТ «Ховар»). — Президенти  ИМА  Барак  Обама   зимни  суханрониаш  тавассути  телевизион  дар  шаҳри Сан — Бернардинои иёлати Калифорния  оташборон  шудани шумораи  зиёди  мардумро   амалиёти террористӣ қаламдод  карда,  Конгресси  ИМА — ро  даъват  намуд, ки  барои истифодаи қувваҳои  ҳарбӣ  зидди  гурӯҳи «Давлати исломӣ» иҷозат  диҳад. Дар  ин  бора CNN   хабар  медиҳад. 
«Ҳадафи ин  падидаи  терроризм  куштани  одамони  бегуноҳ  аст», — фоҷиаи  Сан — Бернардиноро  шарҳ дода  гуфт Барак  Обама. Роҳбари Қасри  сафед  гуфт, ки роҳбарии тирандозони Калифорния Сайёд Ризвон Фаруқ ва Ташфин Маликро ба  ӯҳда доштани «ягон  хел террористони хориҷа», ё «як  қисми  сӯиқасди васеътари» зидди  ИМА будани ин  ҳамла  ҳанӯз  исбот  нашудааст. Барак  Обама  ҳамзамон  изҳор  дошт, ки «хавфу  хатари  терроризм воқеият  дошта» ИМА марҳалаи  нави ҷанг бо терроистонро оғоз  намуда, «онро бартараф  сохтанист». 
«Мо ДИ ё  ҳар  гуна  созмони   дигареро, ки  ба  мо  зарар  расониданист,  нест  мекунем», — гуфт президент. Барак  Обама  итминон  дод, ки  низомиёни   Амрико «шикори» террористонро  дар  саросари  ҷаҳон  «давом  медиҳанд».
 Тавре  ки роҳбари  Қасри  сафед  иброз  дошт, ИМА барои муқовимат  ба терроризм,  аз ҷумла  барои  ҳамкорӣ  бо иттифоқчиёни  худ  ва  Русия «ҳамаи имконотро» истифода  карданист. Ба  тахмини  Обама, хотима  бахшидани  ҷанг  дар  Сурия  ба эътилофи  ҷаҳонӣ   ва  Русия ёрӣ  мекунад, ки  зидди  «Давлати  исломӣ»  мубориза баранд. Мавсуф   ҳамзамон   изҳор  дошт, ки   ИМА  набояд «амалиёти серхарҷи  рӯизаминӣ» — ро оғоз  намояд.
Гурӯҳи  ифротгарои «Давлати  исломӣ» куштори  оммавӣ  дар  иёлати   Калифорнияро  ба дӯши  худ  гирифт.