Департаменти давлатии ИМА хабарро дар бораи иштироки ҚҲҲ дар ҳамла ба пойгоҳи Сурия рад намуд

Душанбе, 08.12.15. (АМИТ «Ховар»).  Дар  ҷараёни  амалиётҳои  зидди созмони  террористии  «Давлати исломӣ»  дар  ҳудуди  Сурия қувваҳои  ҳарбии  ИМА ба  қӯшунҳои  Сурия  зарба  назадаанд, гуфт  намояндаи  Департаменти  давлатии  ИМА Ҷон Кирби. 
«Ман бо  изҳороти  вазорати  мудофиа  дар  мавриди ин  зарба  мубоҳиса карданӣ  нестам. Он чизеро  мегӯям, ки  медонам: ҳақиқат  он  аст, ки   зарба  аз  ҷониби  ИМА  сурат  нагирифтааст. Мо  дар   наздикии  ин  минтақа  амалиётҳо  нагузаронидаем. Мо ҳангоми   роҳандозии  амалиётҳои  ҳавоӣ қувваҳои  Сурияро ба  нишон  гирифтанӣ  нестем. Ҳамаи  амалиётҳои  қувваҳои  эътилоф  зидди «Давлати  исломӣ»  нигаронида  шудаанд», —  гуфт Ҷон  Кирби  дар нишасти  матбуотӣ дар Департаменти  давлатӣ.
Танзимгари маъракаи  ИМА  зидди  «Давлати  исломӣ» Бретт Макгурк ахборотро  дар  бораи  зарбаи  қувваҳои  эътилоф  ба  низомиёни  Сурия   рад  намуд. 
Мувофиқи  хабари  васоити  ахбори  оммаи Ғарб, намояндаи эътилофи  байналмилалӣ Стив  Уоррен  низ ҳамин  фикрро  баён  кард. «Мо  хабарҳои  аз  Сурия  расидаро  шунидем,  вале  мо ба пойгоҳи  Сурия  воқеъ  дар  Дайр  аз  Зор зарба  назадаем», изҳор  дошт  мавсуф.
Мувофиқи  маълумоти ҷониби  Сурия, чор ҳавопаймои қиркунандаи эътилофи  байналмилалӣ  дар  музофоти Дайр  аз  Зор ба  урдугоҳи   артиши  Сурия  зарба  заданд, ки бар  асари  ин  се  сарбоз  ҳалок  гардида,  13  нафари онҳо  захмӣ  шуданд. Фаъолони Шӯрои  назоратӣ  оид ба  ҳуқуқҳои  инсон  дар  Сурия  низ ба  вуқӯъ  пайвастани  зарбаҳоро  тасдиқ  намуданд.