Мизи мудаввар «Сарфарозӣ аз дуои модар аст»

Душанбе, 17.12.2015 (АМИТ «Ховар»).- Дар  Кумитаи кор бо занон ва оилаи назди Ҳукумати Ҷумҳурии Тоҷикистон мизи мудаввар таҳти унвони «Сарфарозӣ аз дуои модар аст» бо иштироки бонувони фаъоли ҷумҳурӣ дар робита ба қабули Қонуни Ҷумҳурии Тоҷикистон «Дар бораи Асосгузори сулҳу ваҳдати миллӣ -Пешвои миллат» аз ҷониби Маҷлиси намояндагони Маҷлиси Олии ҶТ баргузор гардид. Дар чорабинӣ муовини раиси кумита Зулфия Давлатзода оид ба зарурат ва аҳамияти қабули қонуни мазкур зикр намуд, ки нақши Ҷаноби Олӣ  Эмомалӣ Раҳмон дар таҳкими сулҳу субот, ваҳдати миллӣ мақому манзалати воло дошта, ҳамчун ифодасозандаи давлати миллии тоҷикон, машъалафрӯзи роҳи саодат ва нишоту хуррамӣ таҷассум ёфтааст. Арҷгузорӣ ва меҳру садоқати занону модарон ба Президенти кишвар беинтиҳо буда, дар симои фарзанди содиқу вафодор ғамхору ятимпарвар ва пуштибону ҳомиро мебинанд.
Раиси Кумитаи забон ва истилоҳоти назди Ҳукумати Ҷумҳурии Тоҷикистон Шарофзода Гавҳар қабули ин қонунро саривақтӣ ва орзуи доимии мардуми сарбаланди тоҷик номида, аз нақши Сарвари давлат барои ҳифзи Истиқлолияти давлатӣ, анъанаи неки давлатдорӣ ва муттаҳидии халқ дар атрофи ғояҳои созандаю бунёдкорона мисолҳо овард.
Дар идома иштирокдорон Адолат Раҳмонова, Бозгул Додхудоева, Рафиқа Мусоева ва модари 81-сола Саодат Мансурова  нақши таърихии Президенти Ҷумҳурии Тоҷикистон Эмомалӣ Раҳмонро ҳамчун Пешвои миллат дар бунёди давлатдории миллӣ, таъмини сулҳу ваҳдати миллӣ ва таъмини зиндагии пурнишоти мардуми шарифи тоҷик таъкид намуда, аз воқеоти таърихии роҳи паймудаи Сарвари беназири мо дар эъмори давлати миллии тоҷикон нақл карданд.
Муовини  раиси Ҳаракати Ваҳдати миллӣ ва эҳёи Тоҷикистон Рудобаи Мукаррам муҳаббат, самимият ва бовару садоқати занону модарони тоҷикро нисбат ба Ҷаноби олӣ иброз намуда, аз ашъори тозаэҷодаш шеърҳо қироат намуд ва қабули ин қонунро дар шароити кунунӣ як амри воқеӣ ва зарурати таърихӣ ҳисобид.