Навраси тоҷик дар Челябинск мардеро аз ғарқшавӣ наҷот дод
Душанбе, 28.12.2015. (АМИТ «Ховар»). — Як навраси 15-солаи тоҷик дар шаҳри Киштими вилояти Челябинск мардеро, ки дар дарё ғарқ мешуд, наҷот додааст.
Бино ба иттилои расонаҳои хабарии маҳаллӣ, ин корнамоии навраси тоҷик барои дарёфти медали “Барои наҷоти ғарқшудагон” пешниҳод гаштааст.
Дар баробари пешниҳод ба медали “Барои наҷоти ғарқшудагон”, инчунин вазорати маориф ва илми вилояти Челябинск якҷоя бо маъмурияти шаҳри Киштим масъалаи додани ҳаққи шаҳрвандии Русия ба хонаводаи ин наврасро баррасӣ мекунанд.
Шукруллои Ғиёсзода рӯзи 16 декабр ҳангоми ба дарс рафтан аз дарё садои «ёрӣ диҳед»-ро шунида, мебинад, ки марде ғарқ шуда истодааст. Ӯ зуд ба ёрии ин мард шитофта, ӯро аз ғарқшавӣ наҷот додааст.