Ҷонибдорӣ аз шахсияти комилу арзанда

Душанбе, 16.12.2015. (АМИТ «Ховар»).- Дирўз дар Мақомоти иҷроияи маҳаллии ҳокимияти давлатӣ дар ноҳияи Фирдавсӣ бо иштироки доираи васеи ҷавонони касбу кори гуногун  вохӯрии масъулини сохторҳои марбутаи шаҳриву ҷумҳуриявӣ дар доираи қабули Қонуни Ҷумҳурии Тоҷикистон «Дар бораи Асосгузори сулҳу ваҳдати миллӣ-Пешвои миллат» доир гардид. 
Дар вохӯрӣ атрофи хизматҳои шоёну ибратомўз ва нотакрори Президенти кишвар Эмомалӣ Раҳмон андешаронӣ сурат гирифта, ҷавонон аз қабули қонуни мазкур, ки саривақтиву муҳим аст, ҷонибдорӣ ва ҳамовозии хешро иброз намуданд. Таъкид гашт, ки воқеан хизмату талошҳои Президенти кишвар, ки имрўз чун чароғ равшангари роҳи фардои насли наврасу ҷавон дар ҷодаи созандагиву бунёдкорӣ мебошад, ҳар яки моро илҳом ва рўҳияи тоза мебахшад. Хизмату талошҳои Президенти Ҷумҳурии Тоҷикистон Эмомалӣ Раҳмон, дирўзу имрўз ва фардои кишвар ва ҳаёти сокинони онро дурахшон ва ба роҳи фардоиён ҷилои созандагӣ бахшидааст.
Бемуҳобот Эмомалӣ Раҳмон ҳамчун роҳбар, шахсияти арзандаву  комил  ва пешвою кордон дар арсаи сиёсату ваҳдат ва созандагиву бунёдкорӣ корҳоеро ба анҷом расонид, ки таърих шоҳиди онҳост. 
Дар чорабинӣ раиси ноҳияи Фирдавсӣ Табарзода Ҷамшед Афзал,  раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Абдуллозода Аҳтам Рустам, муовини раиси Кумитаи Маҷлиси намояндагони Маҷлиси Олии Ҷумҳурии Тоҷикистон  оид ба корҳои байналмилалӣ, иттиҳодияҳои ҷамъиятӣ ва иттилоот Ҷамшед Саидов ва узви Кумитаи Маҷлиси намояндагони Маҷлиси Олии Ҷумҳурии Тоҷикистон оид ба илм, маориф, фарҳанг ва сиёсати ҷавонон Миралиён Қиёмиддин Абдусалимзода,   бо ҷавонони пойтахт дар атрофи қабули   Қонуни Ҷумҳурии Тоҷикистон «Дар бораи Асосгузори сулҳу ваҳдати миллӣ-Пешвои миллат»  суҳбати судманд анҷом доданд. Ҷавонони пойтахт аз Пешвои миллат Эмомалӣ Раҳмон ифтихор намуда, якдилона иброз доштанд, ки: «Мо ҷавонони пойтахт  дар қатори дигар ҷавонони кишвар пайрави Пешвои миллат Эмомалӣ Раҳмон боқӣ мемонем».