Тақдими туҳфаҳои идона ба Хонаи кӯдакони № 1-и пойтахт

Душанбе, 30.12.2015. (АМИТ «Ховар»).-Имрӯз Раёсати филиали Донишгоҳи давлатии Маскав ба номи М.В. Ломоносов дар шаҳри Душанбе якҷоя бо устодону донишҷӯёни муассисаи таълимӣ дар Хонаи кӯдакони № 1-и махсусгардонидашудаи Раёсати тандурустии шаҳри Душанбе бахшида ба фарорасии Соли нави мелодӣ — 2016 барои наврасону кӯдакони бесаробонмондаи ин муассиса як барномаи фарҳангиву хайриявӣ барпо намуд. Дар фарҷоми намоиши мазкур ба кӯдакону наврасон туҳфаҳои идона тақдим намуда, хотири онҳоро шод намуданд. Бино ба гуфтаи Холиқназар Кӯчакшоев. ноиби директори филиали Донишгоҳи давлатии Маскав ба номи М.В. Ломоносов, чунин иқдомҳои хайрхоҳона бори аввал набуда. балки як рӯз қабл аз ин низ раёсати донишгоҳи мазкур дар мактаб-интернати махсуси № 3 барои бачагони он ҷо ҳамин гуна чорабиниро доир намуд. Ҳамзамон раёсати Донишгоҳи давлатии Маскав ба номи М. В. Ломоносов дар шаҳри Душанбе иқдом дорад дар моҳи январи соли 2016 низ ба кӯдакистонҳои ноҳияи Ҳисор рафта, барои онҳо намоишномаҳои фарҳангӣ барпо гардонида, кӯдаконро бо туҳфаҳои ночизи худ шод намояд.
Бояд гуфт, ки дар Хонаи кӯдакони № 1-и махсусгардонидашудаи Раёсати тандурустии шаҳри Душанбе ҳоло 86 кӯдак таълиму тарбия гирифта истодааст.