Усулҳои нави таълим дар Коллеҷи омӯзгорӣ

Душанбе, 30.12.2015. (АМИТ «Ховар»). -Коллеҷи омӯзгории ба номи Хосият Махсумоваи Донишкадаи давлатии омӯзгории Тоҷикистон ба номи Садриддин Айнӣ, ки дар замони Шӯравӣ омӯзишгоҳи омӯзгории шаҳри Душанбе ба номи Н. Крупская ном дошт, тӯли 55 соли фаъолияташ ҳамчун манбаи боэътимоди тайёр кардани кадрҳои омӯзгорӣ хизмати босазоеро ба анҷом расонидааст.
Дар коллеҷ, ки аз 3 факулта ва 6 кафедра иборат аст, 831 нафар донишҷӯ дар бахши рӯзона ва 980 нафар дар бахши ғоибона таҳсил мекунанд. Ба онҳо зиёда аз 80 нафар устоди варзида, ки бештарашон ба ҳайси омӯзгори асосӣ ва бархе ба ҳайси ҳамкор фаъолият доранд, таълим медиҳанд. Дар соли хониши ҷорӣ маркази забономӯзӣ ва касбомӯзӣ дар назди коллеҷ ба кори худ шурӯъ намуд, ки дар он забонҳои хориҷӣ. аз қабили русиву англисӣ ва омӯзиши компютер ҷорӣ гардид. Тибқи иттиллои директори коллеҷи мазкур доктори илмҳои филология Ширин Ҳайитова аз ҷониби Вазорати маориф ва илми ҷумҳурӣ дар бахшҳои рӯзонаву ғоибона ҷойҳои иловагӣ дода шуданд, ки нақшаи қабул бомуваффақият иҷро гардид. Нахустин бор дар коллеҷ донишҷӯёни курси якуми забони англисӣ тавассути мониторинг аз санҷиши фосилавӣ мегузаранд. Дар коллеҷ корҳои ободонӣ, бартараф намудани мушкилиҳо, бештар таъмир ва омода намудани хобгоҳҳо бомаром идома доранд. Донишҷӯён баробари омӯхтани дониши амиқу ҳамаҷониба, доштани интизоми хубу намунавӣ дар корҳои ҷамъиятӣ низ фаъолона ширкат менамоянд. Дар арафаи соли нав рӯзномаи коллеҷ таҳти унвони «Шамъи рӯзгор» интишор ёфт.