Ҷамъомад оид ба оқибатҳои нохуши гаравидан ба ташкилоти ифротгаро

Душанбе, 19.01.2016. (АМИТ «Ховар»). — Имрӯз дар маркази ноҳияи Айнӣ бо ташаббуси бахши ҷавонон, варзиш ва сайёҳии ноҳия дар ҳамкорӣ бо ташкилоти ҷамъиятии ҷавонон «Созандагони Ватан» ва гурӯҳи ҷавонони «Пешоҳанг» бо донишҷӯёну толибилмони муассисаҳои олии кишвар, ки дар ҳудуди ҷамоати деҳоти Айнӣ зиндагӣ мекунанд, ҷамъомад баргузор гардид.
Дар ҷамъомад асосан доир ба масъалаҳои шомилшавии ҷавонон ба ҳар гуна ҳизбу ҳаракатҳои бегона ва Қонуни Ҷумҳурии Тоҷикистон «Дар бораи масъулияти падару модар дар таьлиму тарбияи фарзанд» табодули афкор сурат гирифт.
Роҳбари ташкилоти ҷавонон «Созандагони Ватан» дар ноҳияи Айнӣ Абдуваҳҳоб Шарифзода гуфт, ки ҳадаф аз ҷамъомади мазкур фаҳмондадиҳии оқибатҳои бади шомилшавии ҷавонон ба ташкилоту ҳаракатҳои ифротӣ ва риояи талаботи қонуни танзим мебошад. «Мо тасмим гирифтем, ки толибилмоне, ки дар пойтахт ва марказҳои вилояту дигар шаҳрҳои кишвар таҳсил мекунанд, ҷамъ оварда, аз оқибатҳои нохуши гаравидан ба ташкилоти ифротгаро ва қабули ҳар гуна урфу одат ва фарҳанги бегона маълумот диҳем, то ки онҳо тавонанд роҳи дурустро интихоб намуда, ба роҳи хато нараванд», — гуфт Абдуваҳҳоб Шарифзода.