Дар Донишкадаи идоракунии давлатӣ 120 духтар таҳсил мекунад

Душанбе, 13.01.2016. (АМИТ «Ховар»). — Дар сохтори Донишкадаи идоракунии давлатии назди Президенти Ҷумҳурии Тоҷикистон се факулта: идоракунии давлатӣ, муносибатҳои байналмилалӣ, аз навтайёркунӣ ва такмили ихтисос, 8 кафедра, ҳамзамон шуъба ва бахшҳо фаъолият менамоянд, ки барои 182 воҳиди корӣ пешбинӣ шудаанд. Дар ин бора зимни нишасти матбуотии рӯзи 12 январ ректори донишкада Лутфия Абдулхолиқзода иттилоъ дод.
Ба гуфтаи ректор, ҳоло дар донишкада 92 корманд фаъолият менамоянд.
Дар зинаи таҳсили бакалавр 509 донишҷӯ таҳсил мукунанд, ки аз онҳо 199 нафарашон дар гурӯҳҳои буҷавӣ ва 310 нафарашон аз тариқи шартномавӣ таҳсил мекунанд, ки 120 нафари онҳоро духтарон ташкил медиҳанд.
“Сессияи имтиҳоноти тобистонаи донишҷӯён дар давраи фаъол бо натиҷаи азхудкунии 89% донишҳо ҷамъбаст гардид. Дар донишкада 139 нафар идрорпулӣ аз ҷумла, 1 нафар идрорпулии президентӣ мегирад»,-илова намуд Л. Абдулхолиқзода.