И. Қурбониён: Барномаи сифат дар 106 корхонаи истеҳсолӣ ҷорӣ гардид

Душанбе, 15.01.2016. (АМИТ «Ховар»).- «Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон дар соли 2015 бо мақсади татбиқи вазифаҳои стратегии мамлакат дар самти таъмини риояи талаботи ҳуҷҷатҳои меъёрии техникӣ, қоидаҳои метрологӣ, ҳифзи бозори истеъмолӣ ва ҳимояи ҳуқуқи истеъмолкунандагон барои дастгирии рушди соҳибкорӣ корҳои муайянеро ба сомон расонид»,- гуфт имрӯз зимни нишасти матбуотӣ директори агентии мазкур Ибодулло Қурбониён.
Ҳамчунин номбурда илова намуд, ки дар доираи татбиқи барномаҳо ва вазифаҳои стратегии мамлакат дар давраи соли 2015 бо мақсади дастгирии рушди истеҳсолоти ватанӣ барои истеҳсоли маҳсулоти босифат ва рақобатпазир, ҳамзамон баланд бардоштани имконоти содиротии мамлакат татбиқи “Барномаи давлатии сифат барои солҳои 2013 — 2015” идома ёфта, дар асоси нақшаи барномаи мазкур дар маҷмӯъ дар 106 корхонаи истеҳсолӣ тибқи феҳристи барнома низоми идоракунии сифат аз рўи меъёрҳои байналмилалӣ ҷорӣ шуд.