Паҳн гардидани 14 ҳазор варақаи таблиғотӣ аз ҷониби Кумитаи оид ба корҳои дин

Душанбе, 12.01.2016. (АМИТ «Ховар»).- «Кумитаи оид ба корҳои дин, танзими анъана ва ҷашну маросими миллии назди Ҳукумати Ҷумҳурии Тоҷикистон бо мақсади пешгирӣ намудани шомилшавии шаҳрвандон ба ҳизбу ҳаракатҳои ифротӣ 14 ҳазор варақаи таблиғотӣ омода ва ба табъ расонида, дар бозорҳои «Корвон» ва «Шоҳмансур»-и шаҳри Душанбе, масҷидҳои ҷомеи марказӣ, ҷомеи шаҳру ноҳияҳои ҷумҳурӣ ба таври ройгон паҳн намуд.»-зикр намуд зимни нишасти матбуотии имрӯза муовини аввали раиси кумитаи мазкур Ҷумъахон Ғиёсов.
Инчунин дар асоси 117 дархост 399 номгӯй адабиёт, 36 дафтар, 1 тақвими динии соли 2015 ва 1049 варақаи дорои мазмуну муҳтавои динӣ дар ҳаҷми 63 ҳазору 583 саҳифа = 3973,93 ҷузъи чопӣ аз ҷониби кумита мавриди таҳлил ва ташхиси диншиносӣ қарор дода шуда, ба 312 номгӯй адабиёт, 7 дафтар ва 783 варақаи дорои мазмуну муҳтавои динӣ хулосаи мусбат, ба 87 номгӯй адабиёт, 1 тақвими динии соли 2015, 29 дафтар ва 266 варақаи динӣ, 19 сурат бо нишондоди парчами ДИИШ ва 1 парчами сиёҳ, ки мазмуну муҳтавои онҳо бо қонунгузории Ҷумҳурии Тоҷикистон мухолифат доштанд, хулосаи манфӣ дода шуд.