Сеюмин мусовии «Истиқлол» ва «Хуҷанд»

Душанбе, 30.01.2016 (АМИТ «Ховар»). -Вохӯрии таҷрибавии дастаҳои «Истиқлол»-и Душанбе ва «Хуҷанд»-и Хуҷанд шоми дирӯз дар варзишгоҳи марказии пойтахт бо натиҷаи мусовии 1 бар 1 ба анҷом расид. Баъди бориши барфи зиёд футболбозони ҳарду даста дар варзишгоҳи пурбарф имконоти худро пурра нишон дода натавонистанд. Ҳисобро дар дақиқаи 32-юм Парвиз Умарбоев боз карда, истиқлолиҳоро ба сафи пеш баровард. Бозингари нави дастаи «Хуҷанд» Марифҷон Марифбоев дар нимаи дуввуми бозӣ натиҷаро баробар кард. Ин сеюмин рақобати «Истиқлол» ва «Хуҷанд» дар соли равон аст, ки мусовӣ ба анҷом мерасад.
Ёдрас мешавем, ки аз ин пештар дар вилояти Суғд дар шаҳри Қайроққум ду вохӯрии ин дастаҳо бо ҳисоби 1 бар 1 ва 2 бар 2 мусовӣ ҷамъбаст шуда буд. Акнун дар идомаи тайёриҳо ба мавсими нави футбол клуби футболи «Истиқлол» ба Туркия сафар мекунад . «Хуҷанд» бо доир кардани як вохӯрии дигар дар шаҳри Душанбе тайёриро ба бозии тогурӯҳии Ҷоми КФО бо клуби «Аҳли Алхалил»-и Фаластин ба анҷом мерасонад.