“Тоҷикфилм” фаъол мешавад

Душанбе, 15.01.2016 (АМИТ «Ховар»).-«Рӯзҳои наздик танзими филми «Саргардонӣ» бо муаллифии Муҳаммад Ғойиб ба анҷом расид, ҳоло садогузорӣ ва мусиқимонии он идома дорад ва рӯзҳои наздик филми «Маро бубахш»-и коргардон Муҳаббат Сатторӣ, ки танзим ва банду басташ ҳоло ки идома дорад, пешкаши тамошобинон мегардад». Ин нуктаро роҳбарияти Кумитаи телевизион ва радио имрӯз дар нишасти матбуотӣ таъкид намуданд.
Дар нишаст зикр гардид, ки соли 2015 дар чаҳорчӯбаи «Барномаи рушди кинои тоҷик барои солҳои 2011-2015» 2 миллион сомонӣ пешбинӣ шуда буд ва ин маблағ тибқи нақша як қисм барои наворбардории филмҳои ватанӣ ва қисми дигар барои хариди таҷҳизоти техникӣ масраф гардид. Дар соли 2015 9 филми бадеӣ, аз ҷумла 5 филми кӯтоҳи бадеӣ, 1 силсилафилм ва 3 филми пурра рӯи навор омад.
Агар солҳои пеш аз ҷониби киностудияи «Тоҷикфилм» 3-4 филм наворбардорӣ мешуд, тайи солҳои 2011-2015 44 филми тозанашр истеҳсол гардид, аз ин 11 филми ҳунарӣ, 15 филми мустанад, 7 филми кӯтоҳметраи ҳунарӣ, 4 филми аниматсионӣ ва 7 филми тарҷума ва дубляжшуда мебошад.