Қурби расмии сомонӣ нисбат ба евро 18,5 фоиз ва рубли русӣ 16,1 фоиз коҳиш ёфт

Душанбе, 26.01.2015. (АМИТ «Ховар»).- Новобаста аз тадбирҳои андешидашуда дар соли 2015 қурби сомонӣ нисбат ба доллари ИМА тамоюли пастравӣ дошт ва қурби расмии он аз 5,3074 сомонӣ то 6,9902 сомонӣ (31,7 фоиз) поён рафт. Қурби бозории хариду фурӯши нақдии 1 доллари ИМА аз 5,47 сомонӣ то 7,58 сомонӣ ё худ 38,6 фоиз афзоиш ёфт. Ин нуктаро имрӯз, 26 январ зимни нишасти матбуотӣ раиси Бонки миллии Тоҷикистон Ҷамшед Нурмаҳмадзода ироа намуд.
Дар баробари ин, дар ин давра қурби расмии сомонӣ нисбат ба евро 18,5 фоиз ва рубли русӣ 16,1 фоиз коҳиш ёфт.
Бино ба гуфтаи раиси БМТ, омилҳои асосии коҳиш ёфтани қурби пули миллӣ нисбат ба асъори хориҷӣ кам шудани вуруди асъори хориҷӣ ба ҷумҳурӣ аз тамоми манбаъҳо, коҳиш ёфтани ҳаҷми гардиши савдои хориҷӣ, маҳдудшавии дастрасии ташкилоти қарзӣ ба қарзҳои асъории бонкҳои хориҷӣ, ноустувории рушди иқтисодиёти кишварҳои шарикони асосии савдо ва пастравии қурби пули миллии ин кишварҳо, бахусус Федератсияи Русия ва Қазоқистон, омилҳои ҳаннотӣ вобаста ба кӯшишҳои нигоҳ доштани даромади калон аз фарқияти қурбҳо дар бозори ғайрирасмии хариду фурӯши доллари нақди ИМА ва ғайраҳо мебошанд.