А. Иброҳим: «Дастовардҳои истеҳсолӣ набояд бар ивази талафоти ҷонӣ таъмин карда шаванд»

Февраль 24, 2016 12:29

Душанбе, 24.02.2016 (АМИТ «Ховар»).-Ин суханро муовини сарвазири мамлакат Азим Иброҳим зимни ҷаласаи кории назоратӣ дар Хадамоти назорати давлатии бехатарии корҳо дар саноат ва соҳаи кўҳкорӣ изҳор дошт.

Дар ҷаласаи кории Хадамоти назорати давлатии бехатарии корҳо дар саноат ва соҳаи кўҳкорӣ масоили вобаста ба таъмини бехатарии меҳнат дар истеҳсолот, андешидани чораҳои саривақтӣ барои пешгирии ҳодисаҳои нохуш дар корхонаҳои саноатию сохтмонӣ, конҳои истихроҷи ангишту маъдан ва иншооти дорои таҷҳизоти ҳамлу нақл ва борбардор баррасӣ шуд.
Тавре муовини сарвазири мамлакат таъкид намуд, бинобар сабаби паст будани сатҳи дониши мутахассисони соҳаҳои кўҳкорию техникӣ ва истеҳсолӣ, ҳамчунин риоя нагардидани техникаи бехатарӣ дар истеҳсолот ҳодисаҳои нохуш нисбат ба соли гузашта бештар ба қайд гирифта шудаанд. Дар солҳои охир бинобар сабаби рушду тараққиёти бемайлони соҳаҳои саноат ва кўҳкорӣ, аз ҷумла афзоиши ҳаҷми истеҳсоли ангишт ва намудҳои гуногуни металл дар мамлакат нишондиҳандаҳои сар задани ҳодисаҳои нохуш низ дар истеҳсолот, мутаассифона, афзун гардидаанд, ки ин боиси нигаронии ҷиддӣ аст. Яке аз сабабҳои афзоиши садамаҳои истеҳсолӣ маҳз риоя нагардидани техникаи ҳатмии бехатарии меҳнат ба ҳисоб меравад.
Дар соли 2015 аз ҷониби Хадамоти назорати давлатии бехатарии корҳо дар саноат ва соҳаи кўҳкорӣ 22 ҳодисаи нохуш ва 1 садамаи истеҳсолӣ ба қайд гирифта шудааст, ки нисбат ба соли 2014 7 ҳодиса зиёд мебошад.
Муовини сарвазир оид ба таъмини бехатарӣ дар истеҳсолот махсусан таъкид намуд, ки дастовардҳои истеҳсолӣ набояд бар ивази талафоти ҷонӣ таъмин карда шаванд. Вобаста ба ин, масъулини соҳа, муҳандисони бехатарии меҳнат дар корхонаю муассисаҳои истеҳсолӣ вазифадор гардиданд, ки барои пешгирӣ кардани ҳар гуна ҳодисаҳои нохуш чораҳои қатъии тахассусиро амалӣ намоянд.
Ҳамчунин ба сардори Нозироти давлатии назорати техникаи борбардор, зарфҳои зери фишор коркунанда ва аттраксионҳо супориш дода шуд, ки назоратро нисбат ба сифати лифтҳои иншооти гуногун дар шаҳру ноҳияҳо пурзўр карда, ҳолати корӣ ва мутобиқати ҳар як лифтро дар алоҳидагӣ аз ташхиси техникӣ гузаронанд ва танҳо дар сурати ба талабот ҷавобгўй будан барои истифодаи онҳо иҷозат диҳанд.

Февраль 24, 2016 12:29

Хабарҳои дигари ин бахш

Тоҷикистон ва Чин барои бунёди роҳҳои дусатҳа дар шаҳри Душанбе ба мувофиқа расиданд
Донишгоҳи байналмилалии сайёҳӣ ва соҳибкории Тоҷикистон ҳамкориро бо ширкатҳои хориҷӣ тақвият мебахшад
Ҷаласаи Шурои ҳамоҳангсозӣ оид ба масъалаҳои омӯзиши касбии кормандони бонкҳои марказӣ (миллӣ) доир шуд
Дар Агентии авиатсияи гражданӣ гардиши ҳуҷҷатҳои электронӣ пурра ба роҳ монда шуд
Ифтитоҳи парвозҳои мустақим дар самти Душанбе – Сиан ва Душанбе – Гуанҷоу баррасӣ гардид
«Стратегияи ҷалби сармоя ба Ҷумҳурии Тоҷикистон барои давраи то соли 2040» дар Шурои ҳамоҳангсози рушд муаррифӣ гардид
Тоҷикистон ва Чин ҳамкориро дар соҳаи инноватсия ва технологияҳои рақамӣ тақвият медиҳанд
Ҳамкории Тоҷикистон бо Барномаи Рушди СММ дар доираи лоиҳаҳои муштарак муҳокима гардид
Дар Истаравшан оид ба истифодаи сарфакоронаи неруи барқ ҷаласа доир гардид
Ҷалби доираҳои соҳибкорию тиҷоратии Русия, Амрико, Покистон ва Беларус ба Форуми байналмилалии «Dushanbe Invest 2025» баррасӣ шуд
Мотосиклронҳои «Ралли Осиёи Марказӣ-2025»-ро дар Тоҷикистон истиқбол гирифтанд
Рушди низоми бонкии Тоҷикистон бо таҳлилгарони ширкати байналмилалии рейтинги «Moody’s Investor Service» баррасӣ гардид