Ҳайати Тоҷикистон барои бозӣ бо Австралия эълон шуд

Душанбе, 18.03.2016. (АМИТ «Ховар»).-Ҳайати дастаи мунтахаби футболи Тоҷикистон дар бозии интихобии қаҳрамонии ҷаҳон-2018 муқобили тими мунтахаби Австралия, ки 24 март дар шаҳри Аделаида баргузор мешавад, маълум шуд. Ба иттилои дафтари матбуоти Федератсияи футболи Тоҷикистон, ба ҳайати дастаи мунтахаби кишвар 18 бозингар дохил шудааст. Дастаи мунтахаби Тоҷикистон омодагиро ба ин бозӣ аз 17 март шурӯъ намуд. Даста дар Варзишгоҳи марказии Душанбе тамрин кард. Рӯзи 19 март дастаи мунтахаби миллии Тоҷикистон бо ҳавопаймо ба Дубай ва аз он ҷо ба Аделаида парвоз мекунад. Бозӣ миёни дастаҳои мунтахаби Австралия ва Тоҷикистон рӯзи 24 март, дар варзишгоҳи «Аделаида Овал» соати 19:30 ба вақти маҳаллӣ (14:00 ба вақти Душанбе) оғоз меёбад. Сардовари бозӣ довари ФИФА Фаҳд Ҷобир Ал-Маррии 30-сола аз Қатар мебошад.
Ёдовар мешавем, ки ҳайати мунтахаби миллии футболи Тоҷикистон дар бозӣ муқобили дастаи мунтахаби Австралия чунин аст: дарвозабонҳо: Алишер Тӯйчиев («Хуҷанд»), Қурбоналӣ Бобоев («Истиқлол»); ҳимоятгарон: Сиёвуш Асроров, Ҷаҳонгир Ҷалилов, Давронҷон Эргашев, Аҳтам Назаров (ҳама аз «Истиқлол»), Далерҷон Тухтасунов, Манучеҳр Аҳмадов, Эраҷ Раҷабов (ҳама аз «Хуҷанд»); нимҳимоятгарон Хуршед Маҳмудов («Барқчӣ»), Нуриддин Давронов, Фаридун Шарифов, Ҷаҳонгир Алиев, Дилшод Восиев (ҳама аз «Истиқлол»), Фирӯз Қараев («Регар-ТадАЗ»); ҳамлагарон Комил Саидов («Барқчӣ»), Манучеҳр Ҷалилов («Истиқлол») ва Давронҷон Тухтасунов аз дастаи ССКА «Помир».