Банақшагирии сармоягузории асосӣ ва махзани макроиқтисодӣ

Душанбе,12.03.2016. (АМИТ «Ховар»).- 11 март Лоиҳаи кумаки техникии Иттиҳоди Аврупо «Дастгирии самтҳои алоҳидаи соҳаи ислоҳоти идоракунии молияи давлатӣ дар ҳамкорӣ бо Вазорати молияи Ҷумҳурии Тоҷикистон» дар мавзӯи «Банақшагирии сармоягузорӣ: вазъи ҷорӣ, монеаҳо ва мушкилот. Махзани макроиқтисодӣ» семинар баргузор намуд.
Чорабинии мазкур барои роҳбарон ва мутахассисони раёсат ва шуъбаҳои банақшагирӣ ва соҳавии вазорату идораҳои Ҷумҳурии Тоҷикистон, Бонки миллии Тоҷикистон, инчунин факултаи молияи Донишкадаи молия ва иқтисоди Тоҷикистон пешкаш гардид, ки дар он зиёда аз 40 мутахассиси масъулиятдори вазорату идораҳо иштирок намуданд.
Дар семинар масоил вобаста ба банақшагирии сармоягузорӣ ва ташаккули махзани макроиқтисодӣ муҳокима шуд. Аз ҷумла, муаррифиҳо дар мавзӯъҳои зерин пешниҳод шуданд: воситаҳои арзёбии хароҷоти сармоявӣ; таҳлили ташаккул ва иҷрои буҷети давлатӣ барои сохтмони асосӣ; раванди арзёбии лоиҳаҳои сармоягузорӣ дар Иттиҳоди Аврупо; рушди доираи макроиқтисодӣ; рушди махзани умумии макроиқтисодӣ.
Мушовирони лоиҳа барои муҳокима як зумра масъалаҳоро пешниҳод намуданд, ки ҳолати амалкунандаи раванди ташаккул ва иҷрои Буҷети давлатиро дар самти маблағгузории хароҷоти асосӣ тавсиф ва монеаҳои душвориҳои мавҷударо шарҳ медиҳанд.
Инчунин тавсияҳои муфид оди ба беҳтар намудани низом, асноди баҳогузории лоиҳаҳои саромягузорӣ дар марҳилаи ибтидоӣ ва намунаҳо аз таҷрибаи пешқадами ҷаҳонӣ пешниҳод шуданд.
Дар самти такмили сиёсати макроиқтисодӣ аҳамияти тавозуни нишондодҳои байнисоҳавие, ки минбаъд дар дурнамои нишондиҳандаҳои макроиқтисодӣ истифода мешаванд, мавриди муҳокима қарор дода шуданд. Ҳамчунин зикр шуд, ки дар доираи фаъолияти мазкур махзани ягонаи нишондиҳандаҳои макроиқтисодӣ ташаккул хоҳад ёфт.