Муаррифии Китобхонаи рақамии ДДХ

Душанбе, 18.03.2016. (АМИТ «Ховар»).-Дар Донишгоҳи давлатии Хуҷанд (ДДХ) ба номи академик Бобоҷон Ғафуров муаррифии «Китобхонаи рақамии донишгоҳ» доир гардид.
Ректори донишгоҳ Анвар Мақсудов зикр намуд, ки татбиқи «Барномаи давлатии компютерикунонии мактабҳои таҳсилоти умумӣ», гузариш ба низоми таҳсилоти кредитӣ дар муассисаҳои таҳсилоти олии касбӣ, таъсиси низоми ягонаи қабул ба мактабҳои олӣ тавассути Маркази миллии тестӣ ва монанди инҳо аз ҷумлаи иқдомоте мебошанд, ки имрӯз барои баланд бардоштани сифати таълиму тарбия ва дарёфти хонандагону донишҷӯёни болаёқат мусоидат доранд.
Сардори Маркази тестии донишгоҳ Дилшод Музаффаров дар мавзӯи «Китобхонаи рақамии ДДХ ба номи академик Бобоҷон Ғафуров: таъсис, ҳадаф ва дурнамо» маърӯза намуда, иброз дошт, ки китобхонаи рақамӣ дорои махзани бузурги китобҳои электронӣ буда, дар он 12 ҳазор китоби дарсӣ, 8 ҳазор роҳнамои таълимӣ, 3 ҳазор комплекси таълимӣ, 2 ҳазор китоби илмӣ, 900 силлабусу маҷмӯи масъалаҳо, 1 ҳазор тесту муаррифӣ, 170 китоби мактабӣ, китобҳои бадеиву оммавӣ-сиёсӣ, луғатҳо ва қомусҳо мавҷуданд.
Китобхонаи рақамӣ дар тамоми биноҳои донишгоҳ барои донишҷӯёну омӯзгорон ва кормандон дастрас буда, истифодабарандагон метавонанд бе мушкилӣ аз он маводи зарурии худро гиранд.