Вазири корҳои дохилӣ — «Мардумитарин вазири тоҷик»

Душанбе, 15.03.2016. (АМИТ «Ховап»).- 14 март намояндаи ҳафтаномаи «СССР» Ҷамила Ҳусейнова ба Вазорати корҳои дохилӣ омада, ҷоизаи «Мардумитарин вазири тоҷик»-ро бо туҳфаи рамзии «СССР» ба вазири корҳои дохилӣ Раҳимзода Рамазон Ҳамро супорид.
Ҷоизаро роҳбари дастгоҳи вазири корҳои дохилӣ полковники милитсия Ализода Анварҷон Ҷума қабул намуда, аз номи вазири корҳои дохилӣ ба ҳайати таҳририяи ҳафтаномаи «СССР», хусусан ба сардабири он Сайёфи Мизроб ва кулли хонандагони ҳафтанома изҳори миннатдорӣ намуд.
Зикр гардид, ки ҳафтаномаи «СССР» аз маъруфтарин ҳафтаномаҳои кишвар буда, барои рушди фазои иттилоотӣ, ҳақиқатнигорона дарҷ намудани матолиб ва баррасии мушкилоти мардум саҳми назаррас дорад.
Бояд тазаккур дод, ки Лоиҳа-озмуни «Мардумитарин вазири тоҷик кист?» аз 1 декабри соли 2015 роҳандозӣ гардида, ба шаҳрвандон имкон дода шуд, ки дар тӯли 3 моҳ аз байни 14 вазир мардумитарин ва дастрастарин вазири хешро интихоб намоянд.
Натиҷаи овоздиҳӣ ва интихоб дар тӯли 3 моҳ ҳар ҳафта дар саҳифаҳои рӯзномаи «СССР» дарҷ гардида, паёму навиштаҳои сокинони кишвар дар бораи фаъолияти ин ё он вазир низ пайваста ба нашр мерасид.
Ба назардошти ҷамъбасти СМС-паёмакҳо ва зангҳои телефонӣ вазири корҳои дохилии Ҷумҳурии Тоҷикистон Раҳимзода Рамазон Ҳамро бо гирифтани 2021 овоз дар лоиҳа-озмуни мазкур сазовори ҷои 1-ум гардид.