“Атлетико” дастаи “Барселона”-ро шикаст дод

Душанбе, 14.04.2016 /АМИТ «Ховар»/.— Дар идомаи бозиҳои ¼ -ниҳоии Ҷоми чемпионҳои Аврупо шоми дирӯз ғалабаи фавқулодаи клуби “Атлетико”-и Мадрид бар “Барселона” мавзӯи баҳси инҳафтаинаи расонаҳои хабарии ҷаҳон хоҳад шуд. Дастпарварони Симеоне бе иштироки Фернандо Торес, ки дар бозии аввали ин дастаҳо аз майдон ронда шуда буд, ҳарифи қудратманди худро бо ҷамъи ситораҳояш ба таслимшавӣ маҷбур карданд ва бо ҳисоби 2 бар 0 шикаст доданд.
Дар дақиқаҳои охири нимаи аввал тӯби партофтаи Саулро истифода карда, Антуан Гризман бо зарбаи калидӣ дарвозаи Марк-Андре тер Штегенро рахна кард. Ҳамин бозингар дар дақиқаи 88-ум бори дигар аз зарбаи 11 –метра голи дуввуми худро ба самар расонида, ғолиби соли гузаштаи Лигаи чемпионҳо- “Барселона”-ро дар муборизаи имсола барои Ҷом барканор кард ва ба «истироҳат» фиристод.
Антуан Гризман, бозингари фаронсавии “Атлетико” дар ин рақобат беҳтарин бозингар эътироф шуд.
Дар бозии дуввуми рӯз “Бавария” дар сафар бо “Бенфика”вохӯрда, натиҷаи барояш мувофиқ- 2 бар 2-ро комёб гардид.
Ёдрас мешавем, ки бозиҳои нахустини “Барселона” бо “Атлетико” бо ҳисоби 2 бар 1 ва “Бавария” бо “Бенфика” 1 бар 0 ҳафтаи гузашта ба анҷом расида буданд.
Ба ҳамин тариқ, “Атлетико” ва “Бавария” якҷоя бо “Реал” ва “Манчестер Ситӣ” муборизаро барои Ҷоми чемпионҳои Аврупо идома медиҳанд.