Дар Русия имрӯз Чемпионати ҷаҳон оид ба хоккей шурӯъ мешавад

Душанбе, 6.05.2016 /АМИТ «Ховар»/. Чемпионати 80-уми ҷаҳон дар ду шаҳри Русия -Маскав ва Санкт-Петербург шоми имрӯз бо баргузории 4 вохӯрӣ оғоз мешавад. Дар таърихи ин бозиҳо маротибаи 7-уми аст, ки он дар Русия ва собиқ Иттиҳоди Шӯравӣ мегузарад. Аз ин пештар солҳои 1957, 1973, 1979, 1986 ва 2007 дар Маскав ва соли 2000 дар Санкт Петербург гузаштааст. Ба ғайр аз дастаи мунтахаби Иттиҳоди Шӯравӣ дар соли 1986 то ба ҳол ягон дастаи мизбон дар он ғолиб наомадааст (Шведҳо соли 2013 дар Шведсия ва Финляндия пирӯз шудаанд).
Ба ҳамин тартиб, дар гурӯҳи А дастаҳои Русия, Шведсия, Чехия, Латвия, Швейтсария, Норвегия, Дания ва Қазоқистон, дар гурӯҳи В Канада, ИМА, Финляндия, Беларус, Словакия, Франсия, Олмон ва Маҷористон шомил шудаанд. Бозиҳои гурӯҳи А дар Маскав ва В дар Санкт-Петербург ҷараён мегиранд.
Имрӯз дастаҳои мунтахаби Русия бо Чехия, Шведсия бо Латвия, Амрико бо Канада ва Финляндия бо Беларус қувва месанҷанд.