Игор Черевченко, ки Тоҷикистонро ватани аслии худ ва «Швейтсарияи Осиё» меномад, дар Душанбе қарор дорад

Май 31, 2016 18:34

Душанбе, 31.05..2016 / АМИТ «Ховар» /. Тарбиятгирифтаи футболи тоҷик-сармураббии «Локомотив»-и  Маскав Игор Черевченко имрӯзҳо дар Тоҷикистон қарор дорад. 30 май  ӯ аз  Академияи «Истиқлол» дар деҳаи  Алмосӣ дидан карда, он ҷо дар бозии фестивали минтақавии футболи АФК (U-14)  иштирок намуд.

Игор Черевченко барои мухлисии дастаи ҷавонони Тоҷикистон, ки дар бозии ниҳоии фестивал бо дастаи Ҳиндустон вохӯрд, омада буд.  Вохӯрӣ бо пирӯзии футболбозони тоҷик бо ҳисоби 2:1 анҷом ёфт. Игор Черевченко аз бозии  ҳамватанони ҷавони худ қаноатманд буд.

«Замини Тоҷикистон ҳамеша аз  истеъдодҳо бой буд. Мо бояд ба тарбияи ин истеъдодҳо бипардозем, ба онҳо кӯмак намоем ва ба онҳое, ки дар рушди футболи Тоҷикистон кӯмаки худро дареғ намедоранд, сипос гӯем»,- гуфт Игор Черевченко. Ҳоло Игор Черевченко ба ҳайси мураббии яке аз беҳтарин дастаҳои футболи Русия- «Локомотив»-и  Маскав, ки чемпиони чандинкарата ва ғолиби Ҷоми Иттиҳоди Шӯравӣ ва Ҷоми Русия аст, фаъолият менамояд.

Igor-3Геннадйевич Черевченко 21 августи соли 1974 дар Тоҷикистон таваллуд шудааст. Қадамҳои нахустинаш дар футбол аз мактаби варзишии Душанбе шуруъ шуда буд. Ӯ ҳамчун ҳимоятгар бозӣ мекард. Соли 1992 дар ҳайати «Помир» чемпиони кишвар ва ғолиби Ҷоми Тоҷикистон гардид.

Соли 1996  Черевченко ба «Локомотив» даъват шуда, дар он ҷо ӯ бештар «сабзид» ва дар ҳайати «роҳиоҳанчиён»  чор дафъа Ҷоми Русия, се бор медали нуқра ва як дафъа медали биринҷиро ба даст овард.

Баъд аз анҷоми футболбозӣ Игор Черевченко ҳамчун мураббии  «Локомотив-Перово» фаъолият кардааст. Аз феврали соли 2008 ба ситоди  мурабиёни дастаи асосӣ шомил шуд.

Igor-221 майи соли 2015 ба ҳайси  иҷрокунандаи вазифаи сармураббии  асосӣ Игор Черевченко ҳамроҳи  «Локомотив» ғолиби Ҷоми Русия  гашта,   дар таърих аввалин касе буд, ки  ҳамчун бозингар ва мураббӣ ба чунин дастоварди арзанда  мушарраф шуд.

22 июни соли 2015 Игор Черевченко расман сармураббии «Локоматив» таъйин шуд.  Дар ин  бора ҳамон вақте огоҳӣ ёфт, ки дар шаҳри Душанбе қарор дошт. Қаблан дар вазифаи «мураббӣ»-и  тими  роҳи оҳани Маскав ду нафар аз дастаи «Помир»-Юрий Семин  ва Рашид Раҳимов кор мекарданд.  Дар омади гап, дар байни нафароне, ки соли гузашта номзадии  Игорро пешниҳод карданд,  Юрий Семин  ва Рашид Раҳимов низ буданд.  Дар мусоҳибае бо рӯзномаи «Азия -Plus» Игор ба ин муносибат гуфт: «Юрий Павлович мисли падарам аст. Ӯ  барои ман  ва  падари  ман бисёр хидмат кардааст. Бо шарофати вай он вақт мо дар Маскав ҷо ба ҷо шудем.  Ба Рашид Раҳимов сипос, ки маро соли 2008  ба ситоди  марказӣ гирифт  ва минбаъд   ман дар ин ҷо мондам».

Хотиррасон менамоем, ки Игор Черевченко 1-2 июн дар Душанбе мусобиқаи сеюми кӯдаконаро  ба  хотираи падари худ Геннадий Иванович Черевченко, собиқ капитани дастаи «Помир» (Душанбе) мегузаронад. Геннадий Черевченко дар замони худ ҳақиқатан яке аз шахсони содиқ ба футболи тоҷик буд. Он замон ӯро ба ЦСКА-и Маскав, «Kaрпати» (Лвов), «Пахтакор» (Тошканд) ва  дастаҳои дигар даъват карда буданд, вале ӯ ба клуби худ «Памир» содиқ монд.

Igor-CHerevchenko-2Шоми 2 июн  Игор Черевченко  ният дорад дар  бозии дастаҳои миллии Тоҷикистону Бангладеш, ки дар Варзишгоҳи марказии ҷумҳуриявии шаҳри Душанбе соати  20:00 бо вақти Душанбе оғоз мегардад, иштирок намояд. Ӯ дар ин бозӣ дастаи мунтахаби миллии Тоҷикистон-кишвареро, ки ӯ ватани аслии худ меҳисобад, мухлисӣ мекунад. Чанде қабл ба саволи хабарнигорони «Спорт-экспресс» ва «АП» дар бораи он, ки оё ӯ Тоҷикистонро ватани худ меҳисобад, ҷавоб дода буд: «Албатта. Ман ин ҷо таваллуд шуда, ба воя расидаам. Дар Русия ман ҳамеша ҷумҳурии худро васф карда, дӯстонро барои боздид аз Тоҷикистон ташвиқ менамоям, то ки онҳо низ аз  табиат ва ҳавои тозаи он лаззат бибаранд. Ман онро «Швейтсарияи хурди  Осиё» ном мебарам. Ман фахр  мекунам, ки дар ин кишвар таваллуд шудаам. Тоҷикистон — Ватани ҳақиқии  ман аст».

Май 31, 2016 18:34

Хабарҳои дигари ин бахш

Рақибони дастаи мунтахаби футзали Тоҷикистон дар марҳилаи интихобии Ҷоми Осиё-2026 маълум шуданд
Дастаи мунтахаби футзали Тоҷикистон дар бозии дӯстона боз бар тими Амороти Муттаҳидаи Араб ғалаба кард
ФУТБОЛ. Фонди ҷоизавии мусобиқаи «Ҷоми Ҷавонӣ-2025» 60 ҳазор сомониро ташкил медиҳад
Бозии дӯстона байни дастаҳои мунтахаби олимпии Тоҷикистон ва Қирғизистон мусовӣ анҷом ёфт
ФУТБОЛ. Истиқлол» бар «Регар-ТадАЗ» ва «Вахш» бар «Хуҷанд» ғалаба намуд
ФУТЗАЛ. Дастаи мунтахаби Тоҷикистон дар бозии дӯстона бо тими мунтахаби Амороти Муттаҳидаи Араб ғолиб омад
«Регар ТадАЗ» дар мусобиқа оид ба волейбол дар ноҳияи Восеъ сазовори Шоҳҷоиза гардид
Дар Ҳисор бозии дӯстонаи дастаи олимпии Тоҷикистон (U-23) бо мунтахаби олимпии Қирғизистон доир мешавад
Федератсияи футболи Тоҷикистон соҳиби ҶОИЗАИ БИРИНҶИИ «FIFA FORWARD AWARDS» гардид
Дастаи мунтахаби футзали Тоҷикистон бо тими Амороти Муттаҳидаи Араб бозиҳои дӯстона анҷом медиҳад
Дар Душанбе бахшида ба Рӯзи байналмилалии Йога ҳамоиши варзишӣ доир гардид
Дастаи мунтахаби Тоҷикистон аз Чемпионати ҷаҳон оид ба ҷудо-2025 бо се медали таърихӣ баргашт