К. Олимов: Ҷаҳонишавӣ на танҳо барои наздик кардани кишварҳову халқҳо шароит муҳайё намудааст, балки хатарҳои ҷаҳонӣ низ ба вуҷуд овардааст
![](https://khovar.tj/wp-content/uploads/2016/05/DSC_0269.jpg)
Душанбе, 31.05.2016 /АМИТ «Ховар»/. Бахшида ба 25-солагии Истиқлолияти давлатии Ҷумҳурии Тоҷикистон бо ташаббуси Институти фалсафа, сиёсатшиносӣ ва ҳуқуқи Академияи илмҳои Ҷумҳурии Тоҷикистон дар Академия имрӯз конфронси илмӣ- амалии ҷумҳуриявии «Ҳимояи манфиатҳои миллӣ, таҳкими истиқлолияти сиёсӣ ва масоили консептуалии рушди давлатдорӣ дар шароити ҷаҳонишавӣ» баргузор гардид.
Зимни баргузории конфронс ноиби президенти Академияи илмҳои Ҷумҳурии Тоҷикистон Кароматулло Олимов иброз намуд, ки шароити имрӯзаи ҷаҳонишавӣ, ки масъалаи бисёр муҳим аст, на танҳо барои наздик кардани кишварҳову халқҳо шароит муҳайё намудааст, балки хатарҳои ҷаҳонӣ низ ба вуҷуд оварда, ба давлатҳои хурди соҳибистиқлол таҳдидҳо бештар гардидаанд. Вале, дар шароити соҳибистиқлолии Тоҷикистон таҳти сарварии Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Ҷумҳурии Тоҷикистон дар 25 соли Истиқлолияти давлатӣ ба муваффақиятҳои зиёде ноил гардид.
Ҳамчунин Кароматулло Олимов иброз намуд, ки дар ин самт олимони ҷумҳурӣ низ бо таҳқиқоти худ хизматҳои арзанда намуда, барои пешбурди корҳои мафкуравӣ дар Тоҷикистон таҳқиқоти илмии зиёде анҷом доданд.