Рӯзи байналмилалии осорхонаҳо дар Осорхонаи миллии Тоҷикистон бо маҳфили ҷолиб таҷлил шуд

Душанбе, 19.05.2016 /АМИТ «Ховар»/. Дирӯз бахшида ба 25-солагии Истиқлолияти давлатии Ҷумҳурии Тоҷикистон ва Рӯзи байналмилалии осорхонаҳо дар  Осорхонаи миллии Тоҷикистон маҳфили фарҳангиву фароғатӣ доир гардид.
Дар он дар баробари дигар меҳмонону сокинони шаҳри Душанбе ва намояндагони гуногункасб, инчунин кормандони мақомоти корҳои дохилӣ бо аҳли оилаашон аз нигораву ёдгориҳои қадимии халқи тоҷик дидан намуданд.
Директори осорхона Абдувалӣ Шарифзода иброз дошт, ки аз соли 1994 инҷониб ҳамасола 18 май ҳамчун Рӯзи осорхонаҳо таҷлил гардида, ба унвони «Шабе дар осорхона» чорабиниҳо доир карда мешаванд. Дар ҷумҳурии мо аз соли 2013 боз имрӯз чун рӯйдоди таърихӣ таҷлил гардида, кормандон ва хоҳишмандон ба осорхонаҳо ба таври ройгон ворид мешаванд ва маркази асосии ин чорабинӣ Осорхонаи миллӣ мебошад.
Дар маҳфил дастовардҳои даврони Истиқлол ба намоиш гузошта шуданд. Ҳамчунин дар қисмати дигар барномаи консертӣ ва маҳфили шеърхонӣ таҳти унвони «Минбари Рӯдакӣ» ташкил гардид, ки дар он наврасон аз ашъори ин қофиласолори назми тоҷик шеърҳо қироат намуда, ёди гузаштагонро шод гардониданд.
Кормандони милитсия аз ин иқдоми наҷиб шод гардида, минатдории самимии худро ба роҳбарияти Ҳукумат ва баргузоркунандагони чорабинӣ расониданд.
Бояд гуфт, ки ифтитоҳи Осорхонаи миллӣ аз ҷумлаи рӯйдодҳои таърихӣ ва дастовардҳои муҳими фарҳангии даврони Истиқлолияти Тоҷикистон мебошад.  20 марти соли 2013 дар маросими кушодашавии Осорхонаи миллии Тоҷикистон Асосгузори сулҳу Ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ширкат варзида, дар толори бузурги он бо намояндагони сершумори зиёиёни эҷодкори ҷумҳурӣ мулоқот намуд.