Дастаи «Помир»-и Душанбе муборизаро барои Ҷоми Тоҷикистон идома медиҳад

Душанбе, 15.06.2016 /АМИТ «Ховар»/. Охирин иштирокдори бозиҳои 1/8- ниҳоии Ҷоми Тоҷикистон муайян шуд. Дастаи «Помир»-и Душанбе дар вохӯрии ҷавобӣ бо тими «Сомон»-и ноҳияи Данғара вохӯрда, бозиашро бо ҳисоби 2:2 анҷом дод ва аз натиҷаи ду вохӯрӣ ба даври минбаъда роҳхат гирифт.
Ёдрас мешавем, ки бозии аввали ин дастаҳо дар шаҳри Душанбе бо ғалабаи шогирдони Зайниддин Раҳимов бо натиҷаи 3:2 ҷамъбаст шуда буд ва акнун дар қуръакашие, ки имрӯз дар бошгоҳи ФФТ баргузор мегардад, «Помир» ба қатори 10 дастаи Лигаи олӣ-«Истиқлол», «Ҳосилот», КМВА «Помир», «Вахш», «Барқчӣ», «Хуҷанд», «Хайр», «Регар-ТадАЗ», «Парвоз», «Равшан» ва ғолибони вохӯриҳои қаблии дастаҳои Лигаи якум  «Саройкамар», «Панҷшер», «Канд», «Бохтар» ва «Ваҳдат» шомил шуд.