Истеъфои сармураббии дастаи мунтахаби Русия баъди бохт аз Уэлс

Душанбе, 21.06.2016 /АМИТ «Ховар»/. Шоми дирӯз сармураббии дастаи мунтахаби Русия Леонид Слутский дар нишасти матбуотии баъди бозӣ арз кардааст, ки гуноҳи ғайриқаноатбахш ҳунарнамоӣ кардани дастаи мунтахаби Русияро дар бозиҳои ниҳоии Ҷоми Аврупо дар Фаронса ба худ мегирад ва аз мансабаш истеъфо медиҳад. Ӯ афзудааст, ки «бояд тими мунтахаби Русияро дигар мураббӣ ба бозиҳои ниҳоии Ҷоми ҷаҳон-2018, ки дар Русия мегузаранд, омода кунад. Футболбозонро мо ба ин бозиҳо ба таври бояду шояд омода карда натавонистем»,- хулоса кардааст Леонид Слутский.
Ёдрас мешавем, ки баъди ҳунарнамоии ниҳоят суст дар бозиҳои интихобии Ҷоми Аврупо Леонид Слутский, сармурабии онвақтаи дастаи мунтахаби Русия Фабио Капелоро иваз карда, бо 4 ғалаба тавонист тими  мунтахаби Русияро ба бозиҳои ниҳоии Ҷоми Аврупо барорад.