Кумитаи ҳолатҳои фавқулода дар ноҳияи Рӯдакӣ бо мактаббачагон машқҳои пешгирӣ аз ғарқшавӣ гузаронид

Душанбе, 8.06.2016 /АМИТ «Ховар»/. Имрӯз Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон дар якҷоягӣ бо ташкилоти  байналхалқии «Международное добрососедство» чорабинии пешгирии ғарқшавиро дар ноҳияи Рӯдакӣ  баргузор намуд.
Дар чорабинӣ зиёда аз 60  нафар хонандагон аз макотиби ноҳияи Рӯдакӣ ҷамъ оварда шуда, ба онҳо тарзи дурусти оббозӣ ва  расонидани ёрии аввалин ба нафарони ғарқшуда омӯзонида шуд.
Ба иттилои полковник Хуршед Гадоев, сардори Раёсати тайёрии омӯзиши аҳолӣ ва баҳисобгирии меъёрҳои ғайриҳарбии Кумитаи ҳолатҳои фавқулода ва мудофиаи граждании Ҷумҳурии Тоҷикистон, вобаста ба гармшавии ҳаво имсол нисбат ба соли гузашта шумораи ғарқшудагон дар ҳоли афзоиш мебошад.
Баргузории чорабинии пешгирии ғарқшавӣ аз ҷониби Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон марҳилаи дуюм буда,  баргузории марҳилаҳои оянда низ ба нақша гирифта шудааст.