Месси дастаи мунтахаби Аргентинаро тарк мекунад

Душанбе,29.06.2016 /АМИТ «Ховар»/. Бохти дастаи мунтахаби Аргентина дар вохӯрии ниҳоии «Ҷоми Амрико-2016» аз тими мунтахаби Чилӣ бо натиҷаи 2:4 ҳамлагари номдори ҷаҳон Лионел Мессии 29-соларо водор кардааст, ки бо ихтиёри як баёния ширкати худро минбаъд дар ҳайати дастаи мунтахаби Аргентина ба поён расонад.
Соли дуввум аст, ки футболбозони аргентинагӣ пай дар пай дар бозии ниҳоӣ аз чилигиҳо ба шикаст рӯ ба рӯ мешаванд. Соли гузашта баъди натиҷаи мусовӣ дар вақти асосӣ ва имсол низ силсилаи зарбаҳои 11 метраи баъдибозӣ ғолиби Ҷоми Амрикоро муайян кард ва Месси натавонист аз ҷаримаи ёздаҳметра тӯбро ба ҳадаф расонад. Баъди ин Месси аз поёни иштироки минбаъдааш дар ҳайати тими миллии Аргентина хабар дод ва гуфт: «барои ман дар мунтахаби Аргентина ҳама чиз тамом шудааст. Ин тасмими ман аст».
Лионел Месси ба шумори гаронбаҳотарин футболбози ҷаҳон, ки қиматаш ба  220 миллион евро мерасад, аз ҷониби хабарнигорони варзишии 54 кишвари аврупоӣ соли гузашта ҳамчун  футболбози беҳтарини Аврупо интихоб шуд ва ӯ ҳамоно дар дастаи «Барселона»-и Испания бозӣ карда,  панҷ маротиба соҳиби тӯби тиллоӣ гардидааст.