Ғолибияти тими Венгрия бар Австрия дар мусобиқоти «Аврупо-2016»

Душанбе, 16.06.2016 /АМИТ «Ховар»/. Дастаи футболи мунтахаби Венгрия бар тими миллии Австрия дар доираи бозиҳои марҳилаи гурӯҳии мусобиқоти «Аврупо-2016» оид ба футбол, ки дар кишвари Фаронса ҷараён дорад, ғолиб омад.
Вохӯрии дастаҳо дар варзишгоҳи «Матмут-Атлантик»-и шаҳри Бордо сурат гирифт. Голи аввали дастаи мунтахаби Маҷористонро дар дақиқаи 62-юми дидор бозингари шинохта Адам Салаи ба ҳадаф расонд. 3 дақиқа қабл аз вақти асосии бозӣ Золтан Штибер бо дарвозабони тими мунтахаби Австрия як ба як баромада, тӯбро озодона вориди дарвозаи ҳарифон намуд.
Ҳамин тариқ, маҷориҳо бо касби 3 имтиёз садрнишини ҷадвали гурӯҳи «F» гардиданд.