Рекорди дастаи мунтахаби Бразилия дар бозиҳои Ҷоми Амрико-2016

Душанбе, 09.06.2016 /АМИТ «Ховар»/. Натиҷаи рекордии бозиҳои Ҷоми Амрико-2016 дар вохӯрии байни дастаҳои Бразидлия ва Гаитӣ гузошта шуд. Мухлисон дар ин бози шоҳиди 8 гол гардиданд. Дастаи мунтахаби Бразилия дар вохӯрии нахустинаш дар силсилабозиҳои Ҷоми Амрико-2016 бо тими мунтахаби Эквадор яке аз бозиҳои дилгиркунандаи ин мусобиқотро нишон дод. «Сеҳргарон»-и бозии футбол- бразилиягиҳо натавонистанд он маҳорату истеъдоде, ки доранд, ба кор баранд ва вохӯрӣ бо натиҷаи мусовии 0:0 ҷамъбаст шуд. Аммо дар бозии дуввуми худ даспарварони Дунга хатои бозии аввалро ислоҳ карда, дарвозаи дастаи Гаитиро зери «борони» тӯб қарор доданд ва бо ҳисоби 7:1 ғалаба карданд. Ба ҳамлагари тими мунтахаби Бразилия Филиппе Коутинё муяссар шуд, ки дар ин вохӯрӣ муаллифи се гол шавад ва аввалин хет-трикро дар мусобиқоти Ҷоми Амрико ба вуҷуд орад. Ренато Агусто ду маротиба, Габриэл Барбоза, Лукас Лима  ва Ҷеймс Марселен низ ҳамчун муаллифони гол номи худро дар протоколи бозӣ сабт карданд.
Дастаи мунтахаби Гаитӣ аз дастаҳои на он қадар қудратманди Ҷоми Амрико муаррифӣ мешавад. Дар бозии гузашта ин тим аз пешсафи гурӯҳи «Б» -мунтахаби Перу бо ҳисоби 0:1 мағлуб шуда буд.
Дар бозии дуввуми рӯз мунтахаби Перу вохӯриашро бо тими мунтахаби Эквадор бо натиҷаи 2:2 анҷом дод. Акнун дар ин гурӯҳ бо 4 имтиёзӣ Бразилия ва Перу пешсаф мебошанд.
Дар идомаи ин бозиҳо субҳи рӯзи дигар Уругвай бо Венесуэла ва Мексика бо Ямайка аз гурӯҳи «С» вориди майдон мешаванд.