228 шаҳрванди Тоҷикистон дар кишварҳои исломӣ машғули таҳсилоти ғайрирасмии динианд

Душанбе, 12.07.16. /АМИТ Ховар/. Айни ҳол, тибқи ҳисоботи шаҳру ноҳияҳои ҷумҳурӣ 228 нафар шаҳрвандони Тоҷикистон дар кишварҳои исломӣ машғули таҳсилоти ғайрирасмии динианд, изҳор дошт зимни нишасти матбуотӣ оид ба фаъолияти нимсола дар соли 2016 раиси Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон Сулаймон Давлатзода иттилоъ дод.
Бинобар иттилои С. Давлатзода, дар давраи ҳисоботӣ, кумита тавассути кормандони шуъба ва бахшҳо оид ба корҳои дин, танзими анъана ва ҷашну маросимҳои миллии мақомоти иҷроияи ҳокимияти давлатии шаҳру ноҳияҳои ҷумҳурӣ маълумотро оид ба теъдоди шаҳрвандони ҷумҳурӣ, ки дар муассисаҳои таълими динии хориҷи кишвар ба таври ғайрирасмӣ таҳсил менамоянд, дастрас намудааст.
Маълум гардид, ки 3233 нафар шаҳрвандони ҷумҳурӣ дар муассисаҳои таълими динии хориҷ аз кишвар таҳсил менамуданд. Дар натиҷаи андешидани чораҳои зарурӣ то дастур 1947 нафар ва баъди дастур 1059 донишҷў баргаштанд. Дар маҷмўъ 3006 донишҷў ба Ватан баргардонида шуданд. Аз ин теъдод, 57 нафарашон дубора ба ҷои таҳсили пешинаашон баргаштанд.
«Новобаста аз кӯшишҳои кумита, ҳанӯз ҳам шаҳрвандони ҷумҳурӣ бо роҳҳои гуногун ба хориҷа барои гирифтани таълими динӣ мераванд»,- афзуд раиси кумитаи мазкур.