Ҷамъбасти фаъолияти нимсолаи соли 2016 дар Вазорати кишоварзӣ

Душанбе, 14.07.2016. /АМИТ «Ховар»/. Муовини вазири кишоварзии Ҷумҳурии Тоҷикистон  Нусратулло Мусоев зимни ҷаласаи ҳайати мушовара зикр намуд, ки: «Вазорати кишоварзии Ҷумҳурии Тоҷикистон  фаъолияти худро дар шаш моҳи аввали соли 2016 дар асоси дастуру супоришҳои Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон вобаста ба соҳаи кишоварзӣ ва Қарори Ҳукумати Ҷумҳурии Тоҷикистон «Дар бораи ҷамъбасти натиҷаҳои рушди иҷтимоию иқтисодии Ҷумҳурии Тоҷикистон дар соли 2015 ва вазифаҳо барои соли 2016» ба роҳ монда, бо мақсади ташаккули истеҳсолоти рақобатпазиру самаранок ва ба ин васила баланд бардоштани сатҳи некӯаҳволии мардум, татбиқи сиёсати аграрии Ҳукумати Ҷумҳурии Тоҷикистон ва сазовор пешвоз гирифтани ҷашни 25- солагии Истиқлолияти давлатии Ҷумҳурии Тоҷикистон  як қатор корҳои амалиро ба анҷом расонид».
Сардорони раёсатҳои кишоварзии вилоятҳои Хатлон, Суғд, Вилояти Мухтори Кӯҳистони Бадахшон ва ноҳияҳои тобеи ҷумҳурӣ низ аз фаъолияти кории худ дар давоми 6 моҳи гузашта ҳисобот доданд.
Вазири кишоварзӣ  Иззатулло Сатторӣ  баҳри саривақт ва дар ҳолати хуби агротехникӣ ба анҷом расонидани кишти такрории зироатҳои кишоварзӣ, ҷамъоварии ҳосили меваю сабзавот, ҳамкории самарабахш бо олимони соҳа ва сазовор ҷашн гирифтани 25-умин солгарди Истиқлолияти давлатии Ҷумҳурии Тоҷикистон ба масъулини соҳа дастуру супоришҳои мушаххас дод.