Ба имзо расидани як қатор қонунҳо аз тарафи Пешвои миллат

Июль 23, 2016 10:47

Душанбе, 23.07.2016 /АМИТ «Ховар»/. Имрӯз аз тарафи Асосгузори сулҳу Ваҳдати миллӣ Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон як қатор қонунҳо, ки аз тарафи Маҷлиси намояндагон қабул гардида, Маҷлиси миллӣ онҳоро ҷонибдорӣ намудааст, ба имзо расонида шуданд.

Қонунҳои Ҷумҳурии Тоҷикистон «Дар бораи шартномаҳои байналмилалии Ҷумҳурии Тоҷикистон», «Дар бораи фаъолияти башардӯстонаи зидди минаҳо», «Дар бораи муроҷиати шахсони воқеӣ ва ҳуқуқӣ», қонунҳои конститутсионии Ҷумҳурии Тоҷикистон «Оид ба ворид намудани тағйиру иловаҳо ба қонунҳои конститутсионии Ҷумҳурии Тоҷикистон «Дар бораи Маҷлиси Олии Ҷумҳурии Тоҷикистон», «Дар бораи вазъи ҳуқуқии узви Маҷлиси миллӣ ва вакилони Маҷлиси намояндагони Маҷлиси Олии Ҷумҳурии Тоҷикистон», «Дар бораи Ҳукумати Ҷумҳурии Тоҷикистон», «Дар бораи судҳои Ҷумҳурии Тоҷикистон» ва Кодекси меҳнати Ҷумҳурии Тоҷикистон аз ҷумлаи онҳо мебошанд.

Тағйиру иловаҳо ба қонунҳои конститутсионии Ҷумҳурии Тоҷикистон «Дар бораи Маҷлиси Олии Ҷумҳурии Тоҷикистон», «Дар бораи вазъи ҳуқуқии узви Маҷлиси миллӣ ва вакилони Маҷлиси намояндагони Маҷлиси Олии Ҷумҳурии Тоҷикистон», «Дар бораи Ҳукумати Ҷумҳурии Тоҷикистон» ва «Дар бораи судҳои Ҷумҳурии Тоҷикистон» бо мақсади амалӣ намудани тағйиру иловаҳои 22 майи соли 2016 ба Конститутсияи Ҷумҳурии Тоҷикистон воридшуда ва таҳкими минбаъдаи ҳокимияти давлатӣ, баланд бардоштани масъулияти узви Маҷлиси миллӣ, вакилони Маҷлиси намояндагони, аъзои Ҳукумати кишвар ва пешрафти фаъолияти онҳо равона карда шудаанд. Муқаррар шудааст, ки узви Маҷлиси миллӣ, вакилони Маҷлиси намояндагон ва аъзои Ҳукумати кишвар шахсоне интихоб ё таъин шуда метавонанд, ки танҳо шаҳрвандии Ҷумҳурии Тоҷикистонро дошта бошанд. Дар навбати худ ба даст овардани шаҳрвандии давлати дигар асос барои қатъ гардидани ваколати узви Маҷлиси миллӣ, вакилони Маҷлиси намояндагони ва аъзои Ҳукумат мегардад. Савганди шахсони мазкур ҷиҳати хизмати софдилона ва садоқат ба халқу Ватан ва ба Президенти кишвар ҷузъи асосии меъёри қонунҳои конститутсионии номбударо ташкил медиҳад.

Инчунин мувофиқи ин тағйиру иловаҳо Шӯрои адлияи Ҷумҳурии Тоҷикистон барҳам дода шуда, вазифаҳои он ба Суди Олӣ ва Суди Олии иқтисодӣ вогузор карда шудааст.

Кодекси меҳнати Ҷумҳурии Тоҷикистон ҷиҳати иҷрои Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон дар таҳрири нав қабул гардида, муносибатҳоро дар соҳаи меҳнат танзим менамояд ва ба таъмини риояи манфиатҳои қонунии кормандон, корфармоён, давлат ва дигар субъектони муносибатҳои меҳнатӣ равона шудааст.

Кодекси мазкур бо истифода аз таҷрибаи пешрафти ҷаҳонӣ таҳия гардида, дар он паҳлӯҳои гуногуни муносибатҳои нави иқтисодию иҷтимоӣ ва риояи ҳуқуқу озодиҳои инсон дар соҳаи меҳнат ба назар гирифта шудааст.

Қонуни Ҷумҳурии Тоҷикистон «Дар бораи муроҷиати шахсони воқеӣ ва ҳуқуқӣ» бо мақсади ба танзим даровардани муносибатҳо вобаста ба муроҷиати шахсони воқеию ҳуқуқӣ таҳия гардида, тартиби пешниҳод ва баррасии муроҷиати шахсони воқеӣ ва ҳуқуқиро ба мақомоти давлатию ғайридавлатӣ новобаста аз шакли ташкилию ҳуқуқии онҳо муайян мекунад.

Қонуни Ҷумҳурии Тоҷикистон «Дар бораи шартномаҳои байналмилалии Ҷумҳурии Тоҷикистон» дар таҳрири нав қабул гардида, мафҳумҳои шартномаҳои байналмилалӣ, тартиби таҳия ва ба имзо расонидан, тасдиқ кардан, ба қайд гирифтан, иҷро намудан, бекор кардан, интишор, боздоштани амали онҳо ва дигар муносибатҳоро вобаста ба шартномаҳои байналмилалӣ муайян ва танзим менамояд.

Мувофиқи тағйиру иловаҳои ба Кодекси ҷиноятии Ҷумҳурии Тоҷикистон воридгардида, барои идора кардани воситаҳои нақлиёт бо рақами қайди давлати бегона, рақами қалбакӣ ва тайёр кардани рақами қалбакии қайди воситаҳои нақлиёт, инчунин идора кардани воситаҳои нақлиёт аз тарафи шахсе, ки ҳуқуқи ронандагӣ надорад ва дар ҳолати мастӣ қарор дорад ҷавобгарии ҷиноятӣ муқаррар карда шудааст.

Тибқи тағйиру иловаҳои ба Қонуни Ҷумҳурии Тоҷикистон “Дар бораи таҳсилоти олии касбӣ ва таҳсилоти касбии пас аз муассисаи олии таълимӣ” воридгардида, дар баробари ятимону бепарасторон ба шаҳрвандони Ҷумҳурии Тоҷикистон, ки хизмати ҳарбиро дар Қувваҳои мусаллаҳи Ҷумҳурии Тоҷикистон адо кардаанд, ҳангоми дохилшавӣ ба муассисаҳои таълимии таҳсилоти олии касбӣ имтиёзҳо муқаррар мекунанд.

Қонунҳои қабулгардида ба таъмини пойдории сулҳу субот, ваҳдату ягонагӣ, ҳифзу ҳимояи ҳуқуқу озодиҳои инсон, манфиати давлат, ташкилоту муассисаҳо, мубориза бо ҷинояткорӣ ва таъмини тартиботи ҷамъиятӣ, таҳкими минбаъдаи ҳокимияти давлатӣ, рушди муносибатҳои байналмилалӣ, фаъолияти иқтисодиву иҷтимоӣ ва пешрафту инкишофи соҳаҳои мухталифи ҳаёти кишвар равона карда шудаанд.

Матни пурраи қонунҳои қабулгардида рӯзҳои наздик дар матбуоти расмии кишвар интишор карда мешавад.

Июль 23, 2016 10:47

Хабарҳои дигари ин бахш

Президенти Ҷумҳурии Тоҷикистон Эмомалӣ Раҳмон бо Президенти Федератсияи Русия Владимир Путин суҳбати телефонӣ анҷом доданд
Сарвари давлат Эмомалӣ Раҳмон Вазири давлатӣ оид ба корҳои савдои хориҷии Вазорати тиҷорат ва савдои Давлати Қатар Аҳмад ибни Муҳаммад Ас-Сайидро ба ҳузур пазируфтанд
Президенти Ҷумҳурии Тоҷикистон Эмомалӣ Раҳмон Вазири сармоягузории Подшоҳии Арабистони Саудӣ Холид Ал-Фолеҳро ба ҳузур пазируфтанд
Пешвои миллат Эмомалӣ Раҳмон Вазири иқтисод ва дороии Ҷумҳурии Исломии Эрон Сайид Алӣ Маданизодаро ба ҳузур пазируфтанд
Сарвари давлат Эмомалӣ Раҳмон Котиби иҷроияи Комиссияи иқтисодии СММ барои Аврупо Татяна Молчанро ба ҳузур пазируфтанд
Суханронии Президенти Ҷумҳурии Тоҷикистон, Пешвои миллат Эмомалӣ Раҳмон дар Форуми байналмилалии сармоягузории «Душанбе Инвест – 2025»
Пешвои миллат Эмомалӣ Раҳмон дар Форуми байналмилалии сармоягузории «Душанбе Инвест — 2025» иштирок намуданд
Анҷоми сафари Президенти Федератсияи Русия Владимир Путин дар Тоҷикистон
Ҷаласаи Шурои сарони давлатҳои иштирокдори Иттиҳоди Давлатҳои Мустақил баргузор гардид
Президенти Ҷумҳурии Тоҷикистон Эмомалӣ Раҳмон бо Президенти Ҷумҳурии Беларус Александр Лукашенко мулоқот намуданд
Президенти Ҷумҳурии Тоҷикистон Эмомалӣ Раҳмон бо Президенти Ҷумҳурии Озарбойҷон Илҳом Алиев мулоқот намуданд
Президенти Ҷумҳурии Тоҷикистон Эмомалӣ Раҳмон бо Сарвазири Ҷумҳурии Арманистон Никол Пашинян мулоқот намуданд