Фишор (стресс) воқеъан ҳам мағзро хароб мекунад

Душанбе, 05.07.2016 / АМИТ «Ховар» /.  Фишори (стресси) доимӣ боиси тағйирот дар сохтори ҷисмонии мағзи сар гашта, ҳуҷайраҳои асабро дар намуди бодомшаклии мағз -қисмати мағз, ки масъули эҳсосот ва дарёфти хатар аст, хароб мекунад, менависад нашрияи  Molecular Psychiatry.
«Аксуламали намуди бодомшаклии мағз ба фишори музмин як раванди хеле мураккаб аст, ки аз тарафи олимони тамоми ҷаҳон солҳои зиёде омӯхта мешавад. Мо сохтори якчанд минтақаҳои намуди бодомшаклии мағзро тадқиқ карда, дарёфтем, ки ҳуҷайраҳои асаб дар қисми мобайнии он аз фишори доимӣ нобуд мешаванд», — гуфт корманди Донишгоҳи Рокфеллер (Иёлоти Муттаҳидаи Амрико) Карл Наска.
Наска қайд мекунад, ки кам шудани шумораи ҳуҷайраҳои асабро, ки қисми миёнаи намуди бодомшаклии мағзро ташкил медиҳанд, метавон  бо зиддиафсурдагиҳои зудамалкунанда назорат кард. Хулосаҳои мувофиқ аз тарафи олимон дар натиҷаи як қатор таҷрибаҳо дар мушҳои лабораторӣ бароварда шуданд.
Мушҳоро бо воситаи ҷойгиркунии онҳо дар ҳуҷраи махсус, ки дар он ҳаво ва фазо барои ҳаракат ҳадди ақал буд, дучори фишор карданд. Хояндаҳо, ки барои муддати дароз дар асорат буданд, бо рафтори зиддииҷтимоии худ ва гум кардани ниёз ба эҳсосоти нав фарқ мекарданд. Онҳо коре накарда, танҳо мехӯрданду (ва на хеле хуб) мехобиданд.