Идомаи амалиёти «Кӯкнор-2016» дар Конибодом

Душанбе, 04.07.2016. /АМИТ «Ховар»/. Дар доираи амалиёти  «Кӯкнор-2016» дар шаҳри Конибодом ҳайати гурӯҳи корӣ таҳти сарварии муовини аввали раиси шаҳр Бахтиёр Ахмедов дар ҳудуди шаҳр ва ҷамоатҳои деҳот рейдҳои санҷишӣ доир намуданд. Гурӯҳи корӣ дар ҳудуди ҷамоатҳои деҳоти Пӯлодон ва Патар дар атрофи якчанд хоҷагиҳои деҳқонӣ растаниҳои худрӯйи нашъаоварро дарёфт карданд. Маълум гардид, ки чунин растаниҳо бо вуҷуди он, ки аз ҷониби соҳибони заминҳо дарёфт ва решакан карда шудаанд, боз дар баъзе мавзеъҳо сабзида, дар ҳолати нашъунамо қарор дорад.
Дар рафти рейд аз тарафи ҳайати гурӯҳи корӣ миқдори дарёфтгардидаи чунин растаниҳои нашъаовар дар ҷояш сӯзонида, нобуд карда шуданд.
Амалиёти «Кӯкнор — 2016» дар шаҳри Конибодом идома дорад.